Almatyda 14 tamyzda amerıkandyq reper Kane Ýestiń (YE) konsertine baılanysty Ortalyq stadıon mańynda kólik qozǵalysy shekteledi. Qala ákimdigi jabylatyn kóshelerdiń tizimin jarıalady, dep habarlaıdy infohub.kz saıty.
Almaty ákimdiginiń málimetinshe, konsert kúni Ortalyq stadıonda ótetin sharaǵa kelýshiler úshin qaýipsizdik pen kólik qoljetimdiligin qamtamasyz etý sharalary uıymdastyrylady. Basty nazar qoǵamdyq kólik jumysyna aýdarylǵan: is-shara aıaqtalǵannan keıin qonaqtardy qalanyń alty baǵyty boıynsha 60 tegin shattl tasymaldaıdy.
Kórermenderge yńǵaıly bolý úshin avtobýstar Ortalyq stadıonnan kelesi núktelerge qatynaıdy: «Almaty Arena» — 10 avtobýs; Raıymbek batyr/«Alataý» metro stansıasy — 10 avtobýs; Almaty-1 temirjol vokzaly — bes avtobýs; Orbıta — bes avtobýs; Juldyz shaǵyn aýdany — 10 avtobýs; Almaty halyqaralyq áýejaıy — 10 avtobýs.
Sonymen qatar, qoǵamdyq kólik pen metropolıten jumysy kúsheıtiledi. «Baıqońyr» metro stansıasy saǵat 21:00-de jolaýshylar úshin jabylady. Konsertke kelýshilerge «Abaı» jáne «Muhtar Áýezov atyndaǵy teatr» stansıalaryn paıdalaný usynylady. Metro jumysy keminde saǵat 01:00-ge deıin, qajet bolǵan jaǵdaıda 03:00-ge deıin uzartylady.
Konsert ótkizýge jáne qaýipsizdik sharalaryna baılanysty saǵat 16:00-den bastap Ortalyq stadıon mańynda kólik qozǵalysy kezeń-kezeńimen shekteledi. Jabylatyn kósheler: Abaı dańǵyly, Baıtursynov kóshesi, Sátpaev kóshesi.
«Qaýipsizdik qyzmetteriniń sheshimi boıynsha jekelegen ýchaskeler erterek jabylýy múmkin. Oryndarda polısıa departamentiniń qyzmetkerleri kezekshilik etip, jol qozǵalysyn baqylaýdy qamtamasyz etip, keptelisterdi boldyrmaýǵa kómektesedi», — dep habarlady ákimdikte.
Almaty turǵyndary men qonaqtaryna marshrýttaryn aldyn ala josparlaý, múmkindiginshe qoǵamdyq kólikti paıdalaný jáne qala ortalyǵyndaǵy ýaqytsha shekteýlerdi eskerý usynylady.
Eske salaıyq, 17 shildede Kane Ýestiń Almatydaǵy konserti týraly aqparat paıda boldy. Aldymen bul týraly onyń menedjeri Djozef Karre habarlady, keıin Almaty ákimdigi konserttiń 14 tamyzda saǵat 21:00-de Ortalyq stadıonda ótetinin rastady.
Polısıa sonymen qatar ınternette alaıaqtardyń konsertke joq bıletterdi satyp jatqanyn habarlaǵan bolatyn. Búgin Almaty polısıasy Kane Ýesttiń jankúıerlerine bılet satyp alý kezinde alaıaqtardyń qurbany bolmaý jóninde usynystar jasady.