Almatyda ashyq aspan astynda kınokórsetilim ótkizýge arnalǵan amfıteatry bar «Qazaqfılm» saıabaǵyn salý josparlanyp otyr. Jańa qoǵamdyq keńistik týraly qala ákimdigi habarlady, dep jazady infohub.kz.
Jańa kıno-park otandyq kıno tarıhyna arnalǵan qoǵamdyq keńistik retinde oılastyrylǵan. Ol mádenıet pen qalalyq ómirdiń toǵysqan jerinde ornalaspaq. Saıabaqty serýendeýge, dem alýǵa jáne otandyq kınematografpen tanysýǵa arnalǵan zamanaýı orynǵa aınaldyrý kózdelgen.
«Jobada taqyryptyq aımaqtar, serýendeý aleıalary, ınteraktıvti jáne mýltımedıalyq ınstallásıalar, balalar alańy men demalys aımaqtary josparlanyp otyr», — dep málimdedi ońtústik astana ákimdiginde.
Qazaqstandyq kıno tarıhyn zamanaýı formatta baıandaý usynylyp otyr. Kelýshiler otandyq kınoındýstrıanyń damýy, kúltti fılmder men eldiń mádenı murasy týraly bile alady.
Saıabaq aýmaǵynda kınokórsetilimder, taqyryptyq kezdesýler men mádenı is-sharalar ótedi.
«Joba júzege assa, Almatyda qazaqstandyq kıno tarıhy qyzyqty, túsinikti ári zamanaýı túrde usynylatyn jańa oryn paıda bolady», — dep túıindedi qala ákimshiliginde.
Jobalaý-smetalyq qujattamany ázirleýshi — «ENVICON-A» JSHS, ol sondaı-aq Panfılov jaıaý júrginshiler kóshesi men Arbatty abattandyrý jobasyn jasaǵan. Jumys merdigeri retinde «Seven Stroi Development» JSHS tańdaldy. Quryltaıshysy — Erik Ótepov, ol Almatyda tirkelgen birneshe qazaqstandyq kompanıamen de baılanysty.
Jobanyń naqty quny ázirge atalmaı otyr, sebebi qujattama áli pysyqtalýda. Saıabaqty jeke ınvestısıalar esebinen júzege asyrý kózdelgen, biraq ınvestor áli tabylǵan joq.
Buǵan deıin «Kýrsıv» ashyq kınoteatrdyń shýynan kórshi úı turǵyndaryn qorǵaý úshin saıabaq aýmaǵy aımaqtarǵa bólinip, aǵashtar otyrǵyzylatynyn jazǵan. Sondaı-aq saıabaqta fýdkorttar men saýda núkteleri ornatylady dep ýáde etilgen.