Almatyda Qazaqstan-Qytaı birlesken jer silkinisin zertteý ortalyǵy jumysyn bastady, dep habarlaıdy infohub.kz.
Saltanatty ashylý rásimine Tótenshe jaǵdaılar mınıstri Shyńǵys Arınov, Almaty ákimi Darhan Satybaldy jáne Qytaıdyń Almatydaǵy Bas konsýly Sý Fansú qatysty.
Qala ákimdiginiń málimetinshe, jańa alań qazaqstandyq jáne qytaılyq ǵalymdardyń seısmologıa salasyndaǵy kúsh-jigerin biriktiredi. Munda jer silkinisin baqylaý, boljaý jáne erte eskertý tehnologıalaryn damytý josparlanýda. Birlesken zertteýler zamanaýı ǵylymı ázirlemelerdi engizýge, tájirıbe almasýǵa jáne qala men aımaqtyń seısmıkalyq qaýipsizdik deńgeıin arttyrýǵa múmkindik beredi, dep atap ótti ákimdikte.
TJM aqparatyna sáıkes, qazaqstandyq tarap ortalyq jumysy úshin qajetti ınfraqurylymdy qazirdiń ózinde jasaqtaǵan. Ulttyq seısmologıa ǵylymı ortalyǵynyń qurylymynda úsh mamandandyrylǵan zerthanasy bar Jer silkinisin zertteý ortalyǵy jumys isteıdi. Olardyń beıini bolashaq birlesken ortalyqtyń úlgisine sáıkes keledi, bul birlesken zertteýlerdi dál qazir bastaýǵa múmkindik beredi.
Yntymaqtastyq aıasynda QR TJM Seısmologıalyq baqylaý jáne zertteý ulttyq ǵylymı ortalyǵy men QHR Jer silkinisi basqarmasynyń Geofızıka ınstıtýty geofızıka jáne seısmologıa salasyndaǵy ózara túsinistik týraly memorandýmǵa qol qoıdy.
Eske sala keteıik, Qazaqstan Prezıdenti Qasym-Jomart Toqaev pen QHR tóraǵasy Sı Szınpınniń Astanadaǵy jaqynda ótken kelissózderiniń qorytyndysy boıynsha 24 úkimetaralyq jáne vedomstvoaralyq qujatqa, onyń ishinde ortalyq qurý týraly kelisimge qol qoıylǵan bolatyn.
Buǵan deıin shilde aıynyń sońynda Almaty turǵyndary jer asty dúmpýlerin sezingeni, al TJM dabyl chemodanyn daıyndaý qajettigin eskertkeni habarlanǵan.