Almatyda 2008 jyly bolǵan rezonanstyq kisi óltirýge qatysýshyǵa úkim shyǵaryldy. Qylmysker uzaq jyldar boıy Qazaqstannan tys jerde jalǵan derektermen jasyrynyp júrgen, dep habarlaıdy infohub.kz saıty.
Qylmys jasalǵannan keıin 17 jyl ótken soń, Almaty qalasynyń qylmystyq ister jónindegi mamandandyrylǵan aýdanaralyq soty Iý.Iý.-ny aldyn ala sóz baılasyp, bir top adamnyń kisi óltirýge kómekteskeni úshin kináli dep tanyp, oǵan 15 jyl bas bostandyǵynan aıyrý jazasyn taǵaıyndady.
Sot anyqtaǵandaı, qylmys 2008 jylǵy 19 mamyrda túnde Almaty ortalyǵynda jasalǵan. Iý. jáne onyń seriktesi A.K. qylmystyq ortanyń ókilimen janjalda bolyp, Fýrmanov kóshesindegi (qazirgi Nazarbaev dańǵyly) úıdiń janynda jábirlenýshini kútip turyp, oǵan birneshe ret dáldep oq atqan, sonyń ishinde baqylaý oǵy — jelke tusynan. Alǵan jaraqattarynan er adam oqıǵa ornynda qaıtys bolǵan.
Kisi óltirýden keıin Iý. Qazaqstannan ketip, halyqaralyq izdeý jarıalanǵan. Onyń seriktesi K. qylmystyq áreketin jalǵastyrǵan. 2008 jyldyń jazynda ol Qapshaǵaıdaǵy (qazirgi Qonaev qalasy) «Staraıa krepost demalys aımaǵyndaǵy qarýly oqıǵadan keıin ustalǵan, sol kezde polısıa qyzmetkeri qaza taýyp, taǵy tórt adam aýyr jaralanǵan. 2009 jyly K. 23 jylǵa bas bostandyǵynan aıyrýǵa sottalǵan.
Osy ýaqyt boıy Iý.-ny izdeý jalǵasqan. Qolda bar aqparatqa sáıkes, ol qylmystyq ortada Kıng-Kong degen laqap atpen belgili bolǵan jáne belgili qyrǵyz qylmystyq avtorıtetiniń aınalasynda bolǵan. Qyrǵyzstannyń quqyq qorǵaý organdary da ony 2007 jyly Bishkekte avtokólik jýý ornynyń ıesin óltirýge baılanysty izdegen. Iý. kóp jyldar boıy Eýropa elderinde jalǵan derektermen jasyrynyp júrgen.
Alaıda 2025 jyldyń tamyz aıynda Lıtva shekarasyn kesip ótý kezinde ol ustalyp, qarasha aıynda Qazaqstan Respýblıkasy Bas prokýratýrasynyń suraýy boıynsha Lıtvadan Otanyna ekstradısıalanǵan.
Qadaǵalaý organynda bul ekstradısıa Bas prokýratýranyń halyqaralyq yntymaqtastyqqa jańa kózqarasynyń jáne sheteldik áriptestermen ornatylǵan ózara is-qımyldyń nátıjesi ekenin atap ótti. «Shet memleketterdiń quzyretti organdarymen tikeleı baılanystardy keńeıtý, aqparat almasýdy jedeldetý jáne halyqaralyq izdestirýdiń zamanaýı tetikterin qoldaný jyldar boıy qazaqstandyq sot tóreliginen jasyrynyp júrgen adamdardyń ornalasqan jerin anyqtaýǵa jáne olardy elge qaıtarýǵa múmkindik beredi», — dep málimdedi Bas prokýratýrada.