Almatyda jeńil relsti kólik (LRT) jelisin 2027 jyldyń sońynda iske qosý josparlanýda, dep habarlaıdy infohub.kz saıty.
Almaty ákimdiginiń baspasóz qyzmeti LRT birinshi jelisindegi daıyndyq jumystarynyń barysy týraly aıtty. Qazirgi ýaqytta negizgi kúsh-jiger Baýyrjan Momyshuly men Tóle bı kóshelerine shoǵyrlanǵan, onda trassany daıyndaý jáne qurylys aımaǵyna túsetin ınjenerlik komýnıkasıalardy qaıta jańartý jumystary júrgizilýde.
Joba boıynsha barlyǵy 375 ınjenerlik komýnıkasıany qaıta jańartý kózdelgen, onyń ishinde jylý jelileri, baılanys jelileri, sýmen jabdyqtaý jáne káriz, nóser kárizi, gazben jabdyqtaý jáne elektrmen jabdyqtaý. Baýyrjan Momyshuly kóshesinde 39 komýnıkasıany qaıta jańartý josparlanǵan, onyń 4 nysany boıynsha jumystar aıaqtaldy. Tóle bı kóshesinde 269 komýnıkasıany qaıta jańartý qajet, onyń 34-i boıynsha jumystar aıaqtaldy. Abylaı han dańǵylynda 67 ınjenerlik komýnıkasıany qaıta jańartý kózdelgen.
Sonymen qatar, eski tramvaı relsteri bólshektelip, eki ortańǵy jolaq sheginde topyraq ázirlendi. Jumysty uıymdastyrýdyń negizgi prınsıpi — shetki jolaqtar boıynsha kólik qozǵalysyn saqtaý. Injenerlik jelilerdi qaıta jańartý qajet bolǵan jaǵdaıda, jol qozǵalysy qarsy baǵyttyń bir jolaǵymen júzege asyrylady. Ádette, mundaı jumystarǵa baılanysty jekelegen ýchaskelerdegi qozǵalys shekteýleri bir-eki kúnnen aspaıdy.
Ákimdikte ınjenerlik komýnıkasıalardy qaıta jańartý LRT trassasyn daıyndaýdyń qajetti kezeńi ekenin atap ótti. Ýchaskeler bosaǵan saıyn jeli konstrýksıalaryn ornatý, shpaldar men relsterdi tóseý jumystary bastalady. Qurylys-montaj jumystaryn qysqy kezeńde de jalǵastyrý josparlanýda. Teris temperatýrada topyraqty qorǵaý, qysqy betondaý, konstrýksıalardy jylytý jáne betonnyń beriktigin jınaqtaý boıynsha tehnologıalyq sharalar qoldanylatyn bolady.
LRT birinshi jelisiniń birinshi kezegi Alataý aýdanynyń ındýstrıaldy aımaǵyndaǵy Móńke bı jáne Baýyrjan Momyshuly kósheleriniń qıylysyndaǵy depodan bastalady. Trassa Baýyrjan Momyshuly kóshesimen Tóle bı kóshesine deıin, sodan keıin Tóle bı kóshesimen shyǵys baǵytta Abylaı han dańǵylyna deıin, ári qaraı Abylaı han dańǵylymen Almaty-2 temirjol vokzalyna deıin ótedi. Sońǵy stansıa retinde «Raıymbek batyr» transporttyq-aýysý toraby kózdelgen.
LRT jelisiniń birinshi kezegi tolyǵymen jer ústinde bolady — estakadalar salý kózdelmegen. Qoldanystaǵy kópir qurylystarynda konstrýksıalar kúsheıtiledi. LRT paıdalanýǵa berilgennen keıin Baýyrjan Momyshuly men Tóle bı kóshelerindegi eki ortańǵy jolaq tek poıyzdar qozǵalysy úshin bólinip, jıek tastarymen bólinetin bolady. Bul qoǵamdyq kóliktiń basymdyǵyn qamtamasyz etip, qozǵalystyń turaqtylyǵy men jyldamdyǵyn arttyryp, jol-kólik oqıǵalarynyń qaýpin azaıtady.
LRT poıyzdarynyń maksımaldy tehnıkalyq jyldamdyǵy 65–70 km/saǵ quraıdy. Alaıda, aıaldamalar arasyndaǵy ortasha qashyqtyq shamamen 700 metrdi eskere otyryp, ortasha jyldamdyq shamamen 30–35 km/saǵ bolady. Bul bólingen jeli boıynsha qoǵamdyq kóliktiń yńǵaıly, qaýipsiz jáne turaqty qozǵalysyn qamtamasyz etedi.
Jelini iske qosý josparlanǵan merzim — 2027 jyldyń sońy. Jobanyń naqty iske asyrý merzimi qajetti jyljymaly quramnyń daıyndaý jáne jetkizý merzimderin eskere otyryp túzetilýi múmkin.