Almaty máslıhatynyń depýtattary «Medeý» erekshe qorǵalatyn tabıǵı aýmaǵy men «Shymbulaq» shatqalyna kólik kirýin shekteý týraly sheshimdi qoldady, dep habarlaıdy infohub.kz saıty.
Aǵymdaǵy jyldyń sáýirinde Almatyda Medeýge kólikpen kirý shektelýi múmkin ekeni, sondaı-aq tómengi bólikte turaqtardy kóbeıtý máselesi qaralyp jatqany habarlanǵan bolatyn. Ony sol kezde Medeý aýdanynyń ákimi Erkebulan Orazalın aıtqan edi.
Jobany sesıada Almaty ekologıa jáne qorshaǵan ortany qorǵaý basqarmasy basshysynyń orynbasary Arshat Baqtygereev tanystyrdy. Onyń aıtýynsha, shekteýler erekshe qorǵalatyn tabıǵı aýmaqqa kólik jáne antropogendik júktemeni azaıtý úshin engizilip otyr.
Jańa tártiptiń qajettiligi Konstıtýsıalyq sottyń 2026 jylǵy 12 maýsymdaǵy qaýlysynan keıin týyndaǵany habarlanady. Sot 2016 jyly ákimdik qaýlysymen belgilengen burynǵy shekteýdi Konstıtýsıaǵa sáıkes emes dep tanyp, mundaı sheshimder máslıhattyń quzyretine jatatynyn jáne turǵyndardyń quqyqtaryn eskerýi tıis ekenin kórsetti.
«Biz burynǵy tártipti jaı saqtap qana qoımaı, ekologıalyq jaǵdaıdy, zańnama talaptaryn jáne turǵyndardyń quqyqtaryn eskere otyryp, kólik júktemesin retteýdiń zańdy tetigin belgileýdi usynyp otyrmyz», — dedi Arshat Baqtygereev.
Basqarma dereginshe, baqylaý-ótkizý pýnktisinen kún saıyn shamamen 700 kólik ótedi. 2026 jyldyń segiz aıynda 179 024 ótý tirkelse, 2022 jyly búkil jyl boıy 76 606 ótý bolǵan.
«Qabyldanǵan sheshim ishki janý qozǵaltqyshy bar kólikterdiń kirýin shekteýdi kózdeıdi. Elektromobılder úshin jeke rejım belgilendi: jumys kúnderi kirýge ruqsat beriledi, al demalys jáne mereke kúnderi shekteý barlyq kólik quraldaryna qoldanylady», — delingen habarlamada.
Sonymen qatar jańa tártip turǵyndardyń múddesin, sondaı-aq jedel, komýnaldyq jáne arnaıy qyzmetterdiń jumysyn eskeretini aıtylady. Munda 48 jeke úı, «Qazgıdromet» pen «Qazselqorǵanystyń» qyzmettik-turǵyn ǵımarattary, sondaı-aq Tuıyqsý shatqalynyń nysandary ornalasqany erekshe atap ótiledi.