Almatyda kámeletke tolmaǵan júrgizýshi kólikpen jeke úıdiń qorshaýyna soǵyldy. Oqıǵa 1 qyrkúıekte tańerteń bolǵan, dep habarlaıdy infohub.kz saıty.
Jol apatynyń saldary túsirilgen vıdeo Instagram-daǵy sergek.kaz paraqshasynda jarıalandy. Kadrlarda Nissan Patrol jyldamdyqpen tas qorshaý men qaqpaǵa soǵylyp, olardyń bir bóligin tolyǵymen qıratqany kórinedi.
Almaty polısıa departamentiniń málimetinshe, apat saǵat 10:00-de Túrksib aýdanynda bolǵan. Kámeletke tolmaǵan júrgizýshi Toqtóǵul kóshesimen ońtústik baǵytta kele jatyp, Artıllerıskaıa kóshesiniń qıylysynda rúlge ıe bola almaı, jeke úıdiń metal qorshaýyna soǵylǵan. Jol apatynan eshkim zardap shekken joq.
Túrksib aýdany polısıa basqarmasynyń qyzmetkerleri oqıǵanyń mán-jaıyn anyqtap jatyr. Balany tárbıeleý jónindegi mindetterin tıisinshe oryndamaǵany úshin kámeletke tolmaǵan júrgizýshiniń ata-anasy jaýapqa tartylady.