Almaty oblysynda quramynda 17 adam bar uıymdasqan qylmystyq topqa sot úkimi shyqty. Olar 800-den astam kólik quralyn zańsyz tirkeýmen aınalysqan. Árbir aıyptalýshynyń qylmysqa qatysý dárejesine qaraı sot 2 jyldan 11 jylǵa deıin bas bostandyǵynan aıyrý jazasyn taǵaıyndady, dep habarlaıdy infohub.kz.
Qarjylyq monıtorıń agenttiginiń málimetinshe, memleketke tólenbegen jalpy soma 6,6 mıllıard teńgeden asty. QMA-niń Almaty oblysy boıynsha departamenti júrgizgen tergeý barysynda qylmystyq top eki jyl boıy belgilengen talaptardy aınalyp ótip, kólikterdi zańsyz tirkeýdi qamtamasyz etkeni anyqtaldy.
Alǵashqy kezeńde sqemaǵa qatysýshylar tehnıkalyq reglament talaptaryn buzyp, Qazaqstanǵa ákelingen 642 júk kóligin zańsyz tirkegen. Keıin qylmystyq áreket jeńil kólikterge qatysty jalǵasqan: «kóshirmelerdi jandandyrý» dep atalatyn sqema boıynsha zańsyz ákelingen kólikterge buryn Qazaqstanda tirkelgen jáne esepten shyǵarylǵan kólikterdiń VIN-kodtary berilgen. Osylaısha taǵy 209 kólik tirkelgen.
Zańsyz sqemaǵa polısıa qyzmetkerleri, arnaıy HQKO qyzmetkerleri jáne jeke notarıýstar qatysqan. Olar aqparattyq júıelerge jalǵan málimetter engizip, jalǵan adamdarǵa senimhattar resimdegen. Tólenbegen tirkeý alymy 5,4 mıllıard teńgeni, al ýtılızasıalyq alym 1,2 mıllıard teńgeni quraǵan.
Tergeý barysynda kólik ıeleri bastapqy tirkeý alymdaryn óz erkimen tólegen, nátıjesinde memleketke 1 mıllıard teńgeden astam qarajat ótelgen. Sonymen qatar, sot úkimimen sottalǵandardyń qylmystyq jolmen tapqan aqshaǵa satyp alǵan bes kóligi memleket kirisine tárkilendi.
Tórt burynǵy polısıa qyzmetkeri arnaýly ataǵynan aıyryldy. Qatysy bar notarıýstarǵa sot notarıattyq qyzmetpen aınalysýǵa tyıym saldy. Sot úkimi zańdy kúshine engen joq.