Almaty oblysynda býkmekerlik keńselerdiń shottaryna iri somalar aýdaryp, júıeli túrde qumar oıyndarǵa qatysqan 20 jeke sot oryndaýshysy anyqtaldy. Operasıalardyń jalpy somasy shamamen 180 mln teńgeni qurady, dep habarlaıdy infohub.kz saıty.
Oblys prokýratýrasynyń resmı saıtynda habarlanǵandaı, tekserý barysynda olardyń bireýi úsh jyl ishinde oıyn shotyna 139 mln teńge, al ekinshisi 26 mln teńge aýdarǵany anyqtaldy. Vedomstvo mundaı kólemdegi aqsha qarajatymen qoǵamdyq mańyzy bar fýnksıalardy atqaratyn adamdardyń qumar oıyndarǵa qatysýy kásibı etıka talaptaryna qaıshy keletinin jáne adaldyq qaǵıdattarynyń saqtalýyna kúmán keltiretinin atap ótti.
Tekserý qorytyndysy boıynsha prokýrorlyq yqpal etý aktileri zańda kózdelgen sharalardy qabyldaý úshin Ádilet departamenti men Jeke sot oryndaýshylardyń óńirlik palatasyna engizildi.