Almaty oblysy Talǵar aýdanynyń taýlarynan belgisiz adamnyń máıiti tabyldy. Ol týrıser tarapynan Seversev muzdyǵy mańynan tabylyp, qutqarýshylarǵa habarlanǵan. TJM qyzmetkerleri qaza tapqan adamdy shamamen 3400 metr bıiktikten evakýasıalady, dep habarlaıdy infohub.kz.
Tótenshe jaǵdaılar mınıstrliginiń baspasóz qyzmetiniń málimetinshe, qutqarýshylar oqıǵa ornyna jetip, qıyn jerdegi taý bóliginen máıitti evakýasıalaǵan. Ony jetkizý úshin «Qazavıaqutqarý» AQ tikushaǵy jumyldyryldy.
Jumys aıaqtalǵan soń, qaza tapqan adam Almaty oblysynyń tergeý-jedel tobyna tapsyryldy. Mamandar adamnyń jeke basyn jáne oqıǵanyń mán-jaıyn anyqtaýy tıis.
Vedomstvo taýǵa shyǵý kezinde qaýipsizdik sharalaryn eske saldy: marshrýtty aldyn ala zertteý, aýa raıyn eskerý, óz fızıkalyq múmkindikterińdi jáne daıyndyq deńgeıińdi obektıvti baǵalaý. Jaqyndaryńa josparlanǵan marshrýt pen qaıtý ýaqyty týraly habarlaý, qaltańda zarádtalǵan telefon, baılanys quraldary jáne qajetti jabdyq bolýy usynylady.
Tótenshe jaǵdaı týyndaǵan kezde 112 nómirine dereý habarlasý qajet.
Buǵan deıin Almaty oblysy Talǵar aýdanyndaǵy Seversev muzdyǵynda Belarýs týrıseri adam qaldyqtary men týrısik jabdyqtardy tapqany habarlanǵan. Almaty TJD málimetinshe, aqparat óńdeýge qabyldanǵan.