Almatyda Medeý aýdandyq qylmystyq ister jónindegi soty qyzmettegi áreketsizdigi aıyptalǵan polısıa qyzmetkerine úkim shyǵardy. Tergeý nusqasy boıynsha, onyń áreketsizdigi Al-Farabı dańǵylyndaǵy ólimge ákelgen jol apatyna sebep bolýy múmkin edi, dep habarlaıdy infohub.kz saıty.
Sýdıa sottalýshyny kináli dep tanyp, oǵan eń tómengi qaýipsizdik deńgeıindegi qylmystyq-atqarý júıesi mekemesinde óteıtin 3,5 jylǵa bas bostandyǵynan aıyrý jazasyn taǵaıyndady.
Sonymen qatar sottalǵan adamǵa memlekettik qyzmette laýazym atqarýǵa ómir boıy tyıym salyndy, ol polısıa serjanty ataǵynan da aıyryldy. Qamaýda ustaý túrindegi bultartpaý sharasy oǵan ózgerissiz qaldyryldy.
Jaza merzimi eń tómengi qaýipsizdik deńgeıindegi mekemede bas bostandyǵynan aıyrý túrindegi jazany óteýdiń eki kúnine qamaýda ustaýdyń bir kúni esebinen esepteledi.
Buǵan deıin Almatyda qalalyq polısıa departamenti bastyǵynyń eks-orynbasarynyń júrgizýshisine qatysty sot talqylaýy bastalǵan. Ol qyzmettegi áreketsizdigi aıyptaldy. Tergeý nusqasy boıynsha, onyń áreketsizdigi Al-Farabı dańǵylynda úsh adamnyń ómirin qıǵan ólimge ákelgen JKO-ǵa sebep bolýy múmkin edi.
Eske salaıyq, 21 naýryzǵa qaraǵan túni Almatydaǵy Al-Farabı dańǵylynda aýyr jol apaty bolǵan. Polısıanyń málimetinshe, Zeekr kóligi qarsy jolaqqa shyǵyp ketip, Mercedes-pen soqtyǵysqan. Saldarynan Mercedes júrgizýshisi men onyń eki jolaýshysy oqıǵa ornynda kóz jumdy.
22 maýsymda sýdıa sottalýshyǵa úkim shyǵaryp, ony kináli dep tanydy jáne eń tómengi qaýipsizdik deńgeıindegi qylmystyq-atqarý júıesi mekemesinde óteıtin 10 jylǵa bas bostandyǵynan aıyrýǵa, sondaı-aq kólik quralyn basqarý quqyǵynan ómir boıy aıyrýǵa sottady.