Almatyda 14 tamyzda ótetin Kane Ýestiń konsertine 40 myńnan astam kórermen jınalady dep kútilýde. Osyǵan baılanysty megapolıstiń polısıasy kúsheıtilgen rejımge kóshedi, dep habarlaıdy infohub.kz saıty.
Almaty polısıa departamentiniń baspasóz qyzmetiniń málimetinshe, stadıonǵa uıymdasqan kirý úshin úsh jaqtan 40 kireberis qarastyrylǵan. Bıletterdi tekserý saǵat 16:00-de bastalady. Kirer aldynda tekserý júrgiziledi, aýmaqqa tek bıleti nemese akredıtasıasy bar kórermender ǵana óte alady.
«Bizdiń basty mindetimiz – konsertke kelgen árbir adamnyń qaýipsizdigin qamtamasyz etý. Óz kirý tobyńyzdy aldyn ala anyqtap, polısıa qyzmetkerleriniń, kúzet qyzmetiniń jáne eriktilerdiń nusqaýlaryn oryndaýdy suraımyz», – dedi Tımýr Nogaıbaev.
Konsert kúni polısıa stadıon men oǵan irgeles aýmaqty patrúldeýdi kúsheıtedi. İs-sharadan keıin kórermenderge qoǵamdyq kólik jáne qosymsha shattldar qamtamasyz etiledi.
Eske salaıyq, buǵan deıin polısıa ınternette alaıaqtardyń konsertke joq bıletterdi satyp jatqanyn habarlaǵan bolatyn. Keıin quqyq qorǵaý organdary Kane Ýesttiń jankúıerlerine bılet satyp alý kezinde alaıaqtardyń qurbany bolmaý jóninde usynystar jasady. Almaty ákimdigi 14 tamyzda konsertke baılanysty qandaı kóshelerdiń jabylatynyn jarıalady, sondaı-aq 32 avtobýstyń baǵyty ózgeretini belgili boldy.