Almatyda polısıa departamentiniń basshylyǵy men qyzmetkerlerine arnalǵan eki kúndik jasandy ıntellekt semınar-trenıngi ótti, dep habarlaıdy infohub.kz saıty.
Oqytýdy Q. Sátbaev atyndaǵy Qazaq ulttyq zertteý tehnıkalyq ýnıversıtetiniń bazasyndaǵy Sıfrlyq úkimetti qoldaý ortalyǵy uıymdastyrdy. Kýrs qatysýshylary jasandy ıntellekt negizderimen, zamanaýı tehnologıalarmen jáne olardyń damý baǵyttarymen tanysyp, sondaı-aq JI-di memlekettik organdar men quqyq qorǵaý salasynda qoldaný múmkindikterin qarastyrdy.
Praktıkalyq bólikke erekshe nazar aýdaryldy. Sabaq barysynda qyzmetkerler jasandy ıntellekttiń zamanaýı quraldaryn jáne olardy qyzmettik, analıtıkalyq jáne basqarý mindetterin sheshýde paıdalaný múmkindikterin zerttedi. Qatysýshylar praktıkalyq jáne taktıkalyq keısterdi taldap, ártúrli jumys jaǵdaılaryn modeldep, sarapshylarǵa suraq qoıyp, alǵan bilimderin tikeleı pysyqtady.
«Búgin jasandy ıntellekt jaı ǵana zamanaýı tehnologıa emes, qyzmettik jumysty uıymdastyrý tásilderin aıtarlyqtaı ózgerte alatyn tıimdi quralǵa aınalýda. Polısıa úshin bul, eń aldymen, úlken kólemdegi aqparatty jyldamyraq taldaý, basqarý sheshimderiniń sapasyn arttyrý jáne jumys prosesterin ońtaılandyrý múmkindigi. Sondyqtan bizdiń mindetimiz – qyzmetkerlerdi JI múmkindikterimen tanystyryp qana qoımaı, osy tehnologıalardy saýatty, jaýapkershilikpen jáne İİO ereksheligin eskere otyryp qoldanýǵa úıretý», – dep atap ótti Almaty qalasy polısıa departamentiniń bastyǵy, polısıa general-maıory Aıdyn Qabdýldınov.
Oqytýdyń jeke blogy analıtıkalyq jáne basqarý mindetterin sheshý úshin jasandy ıntellektti praktıkalyq qoldaný máselelerine arnaldy. Polısıa qyzmetkerleri jekelegen prosesterdi avtomattandyrý, aqparatty daıyndaý jáne taldaý, derektermen jumys isteý jáne ártúrli qyzmettik jaǵdaılarda tıimdi sheshimderdi izdeý múmkindikterin qarastyrdy.
Mundaı oqytýdy ótkizý ishki ister organdary qyzmetkerlerin kásibı daıarlaýdyń jańa kezeńine aınalýda, óıtkeni sıfrlyq quzyrettilikter men zamanaýı tehnologıalardy tıimdi paıdalaný daǵdylary birtindep kúndelikti qyzmettik jumystyń bir bóligine aınalýda, dep habarlady polısıadan.
Eki kúndik kýrs qorytyndysy boıynsha qatysýshylar oqýdy aıaqtaǵanyn rastaıtyn sertıfıkattar aldy.