Almatyda Saın kóshesiniń bir bóliginde jyldamdyq shegi burynǵy 80 km/saǵ ornyna 60 km/saǵ deıin tómendetildi. Bul qala ákimdiginde rastaldy, dep habarlaıdy infohub.kz saıty.
Almaty júrgizýshileri Saın kóshesindegi jyldamdyq rejıminiń ózgergenin baıqap, bul týraly áleýmettik jelilerde habarlady. Ákimdikte bul shekteýdiń magıstraldyń bir bóliginde shynymen engizilgenin rastady.
Almaty qalasynyń jol qozǵalysyn uıymdastyrý jáne jolaýshylar kóligi basqarmasynda túsindirgendeı, ózgerister Saın kóshesiniń Rysqulov dańǵylynan Tóle bı kóshesine deıingi bóligin qamtydy.
«Saın kóshesinde Rysqulov dańǵylynan Tóle bı kóshesine deıingi ýchaskede marshrýttyq kólik quraldarynyń qozǵalysyna arnalǵan bólek jolaqty uıymdastyrý boıynsha is-sharalardy iske asyrý aıasynda jol qozǵalysyn uıymdastyrý sqemasy túzetildi», — dep túsindirdi basqarmada.
Vedomstvo qoldanystaǵy jolaqtardyń enin qaıta bólý nátıjesinde tórt jolaqty uıymdastyrýǵa qol jetkizilgenin atap ótti.
«Bekitilgen sqemaǵa sáıkes qoldanystaǵy jolaqtardyń enin qaıta bólý jumystary júrgizildi, bul tórt jolaqty uıymdastyrýǵa múmkindik berdi», — dep habarlady basqarmada.
Jyldamdyq rejıminiń ózgerý sebebi de túsindirildi.
«Jol qozǵalysy qaýipsizdigin arttyrý maqsatynda jáne Saın kóshesiniń Raıymbek dańǵyly jáne Tóle bı kóshesimen qıylystaryndaǵy kirý-shyǵý joldaryn qamtıtyn kólik aıryqtarynyń erekshelikterin eskere otyryp, atalǵan ýchaskede maksımaldy jyldamdyq 60 km/saǵ deıin shekteldi», — delingen basqarma jaýabynda.