Almatyda Qaırat Satybaldyulyna tıesili bolyp, keıin qalaǵa syıǵa tartylǵan burynǵy qonaq úı ǵımaraty saýdaǵa qoıyldy, dep habarlaıdy infohub.kz.
Almaty qalasynyń Memlekettik múlik jáne jekeshelendirý departamenti elektrondy saýda portalynda Almaly aýdanyndaǵy Dosmuhamedov kóshesi, 115 mekenjaıynda ornalasqan burynǵy qonaq úı kesheniniń ǵımaratyn satý týraly habarlandyrý jarıalady. Lottyń bastapqy baǵasy — 12 759 410 000 teńge. Saýda-sattyq 25 qyrkúıek saǵat 10:00-ge belgilengen. Bul rette nysandy saýdaǵa jalǵyz qatysýshyǵa satýǵa jol beriledi.
Buǵan deıin Memlekettik múlik jáne jekeshelendirý departamenti 2023 jylǵy tamyzda syıǵa tartý sharty negizinde qonaq úıdiń memleket kirisine ótkenin habarlaǵan bolatyn. Sol jyldyń qyrkúıeginde ol Sot ákimshiligi departamentiniń balansyna berildi.
Jelide ǵımaratty buzýy múmkin degen aqparat taraǵan edi, alaıda qala ákimdigi NUR.KZ tilshisiniń saýalyna burynǵy qonaq úıdiń buzylmaıtynyn jetkizdi. Sonymen qatar, joba aıaqtalǵannan keıin ǵımarat jer telimimen birge «Almaty qalasynyń sıfrlandyrý basqarmasy» komýnaldyq memlekettik mekemesine beriletini aıtyldy. Ákimdik jaýabynda: «Budan ári nysan sıfrlandyrý jáne jasandy ıntellektti damytý salasyndaǵy memlekettik baǵdarlamalardy iske asyrý, sondaı-aq IT, AI, kreatıvti ındýstrıa jáne basqa da sabaqtas baǵyttarda jumys isteıtin rezıdentterdi ornalastyrý úshin paıdalanylatyn bolady», — delingen.
Eske salaıyq, 2022 jylǵy qyrkúıekte sot Satybaldyulyn urlyq isi boıynsha kináli dep tanyp, ony ortasha qaýipsizdik mekemesinde jazasyn óteýmen alty jylǵa bas bostandyǵynan aıyrýǵa sottaǵan edi. Keıin oǵan merziminen buryn shartty túrde bosatýdan bas tartyldy.
Satybaldyulynyń isi boıynsha jańa sot prosesi 2024 jylǵy 1 sáýirde Astanada bastaldy. Tyńdaýda aıyptalýshynyń Reseıdegi, BAÁ-degi, Fransıadaǵy jáne Qazaqstandaǵy múlki týraly aıtyldy. Keıin Satybaldyulyna memleketke jyljymaıtyn múlik pen lúks avtokólikterdi qaıtarýǵa ýaqyt berilgeni belgili boldy. Prokýror Nurmahanov Satybaldyuly tarapynyń memleketke qylmystyq aktıvterdi qaıtarýǵa keliskenin habarlady.
Antıkorda Qaırat Satybaldyulynyń isi boıynsha taǵy 50 mlrd teńge qaıtarylatyny aıtylǵan edi. 2024 jylǵy tamyzda Antıkorda Satybaldyulynyń memleketke naqty ne qaıtarǵany týraly aıtyldy. Keıin Bas prokýratýrada taǵy 50 mlrd teńgege múlik memleketke qaıtarylatyny habarlandy.