Almatyda jeti jasar bala skorpıonnyń shaǵýynan zardap shekti. Oqıǵa aýlada oınap júrgen kezde bolǵan, dep habarlaıdy infohub.kz saıty.
Balanyń anasy áleýmettik jelide aıtqandaı, ulynyń bas barmaǵynyń jastyqshasynan shaǵyp alǵan. Otbasy dereý jedel járdem shaqyryp, medısınalyq kómekke júgingen. Manas kóshesindegi balalar juqpaly aýrýlar aýrýhanasynda dárigerler olarda qarsy ý men arnaıy ekpe joq ekenin aıtyp, baqylaý úshin reanımasıaǵa jatqyzýdy usynǵan. Alaıda bala aýrýhanada jalǵyz qalýdan qorqyp, ata-anasynyń baqylaýymen úıde qaldyrylǵan. Anasynyń aıtýynsha, saýsaq isingen, temperatýra bir ret kóterilgen, biraq ózdiginen qalpyna kelgen.
Almaty qoǵamdyq densaýlyq saqtaý basqarmasy ótinishti rastady. Bala Balalar shuǵyl medısınalyq kómek ortalyǵynyń qabyldaý bólimshesine jetkizilgen. Qarap tekserý kezinde dárigerler aýyrsynýdy, saýsaqtyń ortasha isinýin, qyzarýyn, jalpy álsizdikti jáne 37,1 gradýs temperatýrany anyqtaǵan. Reanımatolog pen hırýrgtiń keńesinen keıin skorpıon ýynyń ýytty áserine baılanysty reanımasıa jáne qarqyndy terapıa bólimshesine jatqyzý usynylǵan. Dıagnoz — skorpıon ýynyń ýytty áseri, jaǵdaıy ortasha aýyrlyqta.
Alaıda ata-ana zańdy ókilder retinde aýrýhanaǵa jatqyzýdan bas tartyp, qolhatpen balany úıge alyp ketken. Dárigerler yqtımal saldarlar men asqyný qaýpi týraly eskertip, jaǵdaı nasharlasa dereý kómekke júginýdi usynǵan.
Basqarmada atap ótkendeı, 2026 jyldyń jazǵy maýsymynyń basynan beri bul Almatydaǵy Balalar shuǵyl kómek ortalyǵynda tirkelgen skorpıon shaǵýdyń alǵashqy jaǵdaıy.