Almatyda 1 qazannan bastap sýmen jabdyqtaý jáne sý burýdyń jańa tarıfteri kúshine enedi. NUR.KZ agenttigi «Almaty Sý» kompanıasyna silteme jasap habarlaýynsha, megapolıs turǵyndary úshin qosylǵan qun salyǵyn qosa eseptegende bir tekshe metr sý 178,06 teńge turady, dep jazady infohub.kz saıty.
«Almaty Sý» tarıfteri tutynýshy sanatyna tikeleı baılanysty. Halyq úshin sýmen jabdyqtaý quny bir tekshe metrge 178,06 teńge, al sý burý — 119,46 teńge bolady.
Bıznes úshin joǵaryraq tarıf belgilengen. Zańdy tulǵalarǵa sý bir tekshe metrge 362,18 teńge, al sý burý — 264,75 teńge turady. Osylaısha, eki qyzmet birge bızneske bir tekshe metrge 626,93 teńgege shyǵady.
Memlekettik mekemeler men kásiporyndarǵa, sondaı-aq memleketke daýys beretin aksıalardyń nemese qatysý úlesteriniń keminde jartysy tıesili uıymdarǵa jeke mólsherleme qarastyrylǵan. «Bul sanat úshin QQS-pen bir tekshe metr sý 649,60 teńge, sý burý — 189,14 teńge turady. Jalpy alǵanda — bir tekshe metrge 838,74 teńge», — delingen saıtta.
Eseptegishi joq tutynýshylar úshin sý burý quny bólek esepteledi. «Sýyq sýdy burý tarıfi adam basyna aıyna 1791,85 teńge, ystyq sýdiki — 376,29 teńge. Eseptegish ornatý tehnıkalyq múmkin emes eski jáne apatty úıler men jataqhanalardyń turǵyndary úshin bul qyzmet adam basyna 641,48 teńgege shyǵady. Eseptegishi joq adam úshin turmystyq sýyq sýmen jabdyqtaý sýyq sýdy burýmen birge QQS-pen aıyna 4462,75 teńge bolady», — dep kórsetilgen «Almaty Sý» kestesinde.
Baqsha, gazon, gúlzarlar men aǵashtardy sýarý úshin de jeke normatıv belgilengen. 1 qazannan bastap ol sýarý alańynyń bir júz sharshy metrine aıyna QQS-pen 1780,60 teńge bolady.
Aıta keteıik, sýarý maýsymy alty aıǵa sozylady — 15 sáýirden 15 qazanǵa deıin. Sýarýǵa sýdy 23:00-den 05:00-ge deıin paıdalanýǵa ruqsat etiledi.