Almatylyq sýretshi Shahıza Qýanyshbekova «Ajarly Almaty» respýblıkalyq baıqaýyna qatysýshylar tapsyrǵan kartınalardyń taǵdyryna shaǵymdandy: onyń aıtýynsha, avtorlarǵa jumystary áli kúnge qaıtarylmaǵan, dep habarlaıdy infohub.kz saıty.
Kursiv LifeStyle basylymy atap ótkendeı, sýretshilerde baıqaý uıymdastyrýshylaryna birqatar suraq týyndaǵan.
16 qyrkúıekte Almatyda jeńimpazdardy marapattaý jáne baıqaýdyń qorytyndy kórmesiniń ashylýy ótti. Barlyǵy uıymdastyrýshylar 168 jumys qabyldaǵan, onyń 109-y ekinshi kezeńge ótken. Jeńimpazdar 10,5 mln teńge kólemindegi júlde qoryn bólisti, taǵy bes sýretshige kótermeleý syılyǵy berildi.
Qýanyshbekova baıqaýǵa «Neondy kúnbatys» kartınasymen qatysqan. Ol buǵan birneshe apta jumys, materıaldar jáne kóp ýaqyt jumsaǵanyn aıtty. Túpkilikti irikteýden keıin sýretshi kartınasyn qaıtaryp ala almaǵan.
«Júldeli oryndarǵa ıe bolmaǵan ondaǵan sýretshiniń jumystary ne bolady?» – dep suraıdy Qýanyshbekova beıneúndeýinde.
Sýretshiniń aıtýynsha, uıymdastyrýshylar baıqaý jumystary qaıtarylmaıdy degen sharttyń tarmaǵyna silteme jasaıdy. Alaıda onyń sózinshe, kóptegen sýretshige bul shart tek jeńimpaz jumystarǵa qatysty dep túsindirilgen. Endi avtorlar júlde almaǵan kartınalarǵa ne bolatynyn bilgisi keledi.
Qýanyshbekova sýretshilerge kórme aıaqtalǵan soń óz jumystaryn alyp ketý múmkindigi berilýi tıis dep esepteıdi.
«Kartına – avtordyń materıaldyq jáne zıatkerlik menshigi. Eger jumys úshin syıaqy tólenbese jáne ol júldeger atanbasa, ony óteýsiz alyp qoıý kásibı sýretshiniń eńbegin qunsyzdandyrady», – dedi ol.
Buǵan deıin Kursiv LifeStyle Almatyda 18 qyrkúıekten 3 qazanǵa deıin ARYQ Fest zamanaýı óner festıvali ótetinin, onyń barysynda sýretshilerdiń sheberhanalaryna kóz júgirtýge bolatynyn jazǵan edi.