Almaty taýlarynda 1953 jyly týǵan joǵalǵan sheteldik azamatty izdeý jalǵasýda: izdeýge qatysýshylar sany shamamen 50-den 130 adamǵa, al drondar sany jetiden 11-ge deıin ulǵaıtyldy. Jumystar táýlik boıy júrgizilýde, dep habarlaıdy infohub.kz saıty.
Tótenshe jaǵdaılar mınıstrliginiń málimetinshe, izdeý jumystary Medeý aýdanyndaǵy Talǵar asýy mańynda, shamamen 3200 metr bıiktikte shoǵyrlanǵan. Oqıǵa ornynda shtab qurylyp, operasıany Almaty qalasynyń Tótenshe jaǵdaılar departamentiniń basshylyǵy úılestirýde.
İzdeý toptary qoljetimsiz ýchaskelerdi, shatqaldardy, betkeılerdi jáne asýlar men shyńdarǵa qaraı baǵyttalǵan marshrýttardy tintýde. Sonymen qatar izdeý aımaǵyndaǵy sý qoımalarynyń akvatorıasy tekserildi. Qutqarýshylar jańa ýchaskelerdi tekserýdi jalǵastyryp, izdeý aımaǵyn keńeıtýde.
Operasıaǵa TJM qyzmetkerleri, qalalyq Monıtorıń jáne jedel den qoıý ortalyǵy, «Barys» respýblıkalyq qutqarý qyzmeti, polısıa qyzmetkerleri, sondaı-aq DSS eriktileri tartyldy. 130 adam men 11 dronnan bólek, segiz birlik tehnıka, úsh kınologıalyq esep jáne TJM avıasıasy jumyldyryldy.
Jumysty taý relefi, aıtarlyqtaı bıiktik jáne jekelegen ýchaskelerdiń qoljetimsizdigi qıyndatýda. Aýmaqty tekserý relef pen aýa raıy jaǵdaılaryn eskere otyryp, úzdiksiz júrgizilýde.
Buǵan deıin «Kýrsıv» jazǵandaı, 28 qyrkúıekte sheteldik azamat «Shymbulaq» arqan jolymen toppen birge kóterilip, keıin qalaǵa óz betinshe túsýdi sheshken. Ol qonaqúıge oralmaǵan. Joǵalý týraly habarlama «112» púltine 29 qyrkúıekte túsip, sol kúni izdeý jumystary bastalǵan.