Almatyda turǵylyqty jeri jáne ýaqytsha turatyn jeri boıynsha azamattardy tirkeýdiń jańa normatıvi engizildi: endi tirkeý kezinde turǵyn úıdiń aýdany eskeriledi — bir adamǵa jalpy aýdany keminde 15 sharshy metr, dep habarlaıdy infohub.kz saıty.
NUR.KZ agenttiginiń qala ákimdigine silteme jasap habarlaýynsha, jańa normatıv týraly sheshimdi máslıhat sesıasynda jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov jarıalady.
«Jańa tártip bir mekenjaıda kóp adamnyń tirkelý jaǵdaılaryn shekteý jáne halyqtyń naqty sany týraly derekterdi dálirek etý úshin engizilip otyr», — dedi ákimdikte.
15 sharshy metr normatıvi ár adamǵa osyndaı aýdandaǵy jeke turǵyn úı berilýi tıis degendi bildirmeıtini naqtylandy. Bul — tek tirkeý kezinde qoldanylatyn eseptik kórsetkish.
Alaıda shekteý turǵyn úı ıesiniń otbasy músheleri men jaqyn týystaryna qoldanylmaıdy. Belgilengen normatıvten tys jubaıyn, balalaryn jáne olardyń otbasy múshelerin, jaqyn týystaryn, sondaı-aq asyraýynda, qamqorlyǵynda nemese qorǵanshylyǵyndaǵy adamdardy tirkeýge bolady.
«Jańa normatıv tirkeý esebin retteýge jáne ár aýdanda naqty qansha adam turatynyn dálirek bilýge múmkindik beredi. Bul mektepterge, emhanalarǵa, komýnaldyq jáne ózge de qalalyq ınfraqurylymǵa júktemeni josparlaý úshin mańyzdy», — dep qosty Baýyrjan Jaýbasov.
Almaty máslıhaty mundaı normatıvti belgileý quqyǵyn «Almaty qalasynyń erekshe mártebesi týraly» zańǵa 2026 jylǵy 14 qyrkúıekte kúshine engen ózgeristerden keıin aldy.