Almatynyń Áýezov aýdanyndaǵy birinshi shaǵyn aýdanda turǵyn úıdiń aýlasynan ıesiz paket tabyldy. Onyń ishinde patrondar men kúshi joıylmaıtyn gaz granatasy bolýy múmkin zat bar. Bul týraly infohub.kz saıty qalalyq polısıa departamentine silteme jasap habarlaıdy.
Tabylǵan zatty ótip bara jatqan adam baıqap, dereý 102 nómirine habarlaǵan. Oqıǵa ornyna patrúldik polısıa qyzmetkerleri men tergeý-jedel toby keldi. Aýmaq tekserilip, kúdikti paket alynyp, tabylǵan zattar sot-ballıstıkalyq saraptamaǵa jiberildi.
Almaty polısıasynyń málimetinshe: «İshinen patrondar men kúshi joıylmaıtyn gaz granatasy bolýy múmkin zat tabyldy. Barlyǵy sot-ballıstıkalyq saraptamaǵa jiberildi. Mamandar tabylǵan zattardyń túri men sıpattamasyn anyqtaıdy».
Qazirgi ýaqytta polısıa qyzmetkerleri oq-dárilerdiń shyǵý tegin, tıesiligin jáne turǵyn úıdiń aýlasynda paıda bolý mán-jaıyn anyqtap jatyr. Tergeýdi Áýezov aýdanynyń polısıa basqarmasy júrgizýde.
Polısıa azamattarǵa eskertedi: kúdikti zattardy baıqaǵan kezde olarǵa qol tıgizbeý nemese jyljytýǵa tyryspaý kerek. Qaýipsiz qashyqtyqqa sheginip, 102 nómirine habarlaý qajet.
Buǵan deıin Almatyda áıeldi qýyp, oǵan qarýǵa uqsaıtyn zatty baǵyttaǵan júrgizýshi ustalǵany habarlanǵan. Polısıa onyń oıynshyq tapansha ekenin anyqtady. Er adamǵa qatysty usaq buzaqylyq faktisi boıynsha ákimshilik is qozǵalyp, jol qozǵalysy erejesin buzǵany úshin materıal jasaldy.