Aldaǵy jeksenbide, 16 tamyzda, Almatyda qalanyń negizgi magıstraldarynda kólik qozǵalysyna ýaqytsha shekteýler engiziledi. Bul áýesqoılar men ardagerler arasyndaǵy Gran Fondo World Championship velojarysynyń ótýine baılanysty, dep habarlaıdy infohub.kz saıty.
Almaty ákimdiginiń málimetinshe, jarysqa álemniń 20-dan astam elinen myńǵa jýyq sportshy qatysady. İs-shara 16 tamyzda ótedi, al qatysýshylar men kórermenderdiń qaýipsizdigin qamtamasyz etý úshin Ál-Farabı dańǵyly men Shyǵys aınalma avtomobıl jolynyń (SHOAJ) jekelegen ýchaskelerinde qozǵalys sqemasy ózgertiledi.
05:30-den 06:40-qa deıin Dostyq dańǵylynan Talǵar traktisine deıingi aralyqta Ál-Farabı dańǵyly men SHOAJ boıynsha qozǵalys ýaqytsha shekteledi. Sonymen qatar, 05:30-den 10:30-ǵa deıin Dostyq dańǵylynan Naýaı kóshesine deıingi Ál-Farabı dańǵylynyń ýchaskesinde de shekteýler qoldanylady.
Ákimdik bul sharalar jarysqa qatysýshylar men jol qozǵalysynyń qaýipsizdigin qamtamasyz etý úshin engiziletinin atap ótti. Júrgizýshilerdiń ózgeristerdi eskerip, baǵdaryn aldyn ala josparlaýy suralady.