Almatyda Úlken Almaty ózeniniń jaǵalaýyndaǵy rekonstrýksıa jalǵasýda, endi onyń bir bóligi jaıaý júrginshilerge ýaqytsha jabylady. Jumys barysyna qaraı shekteýler kezeń-kezeńimen engiziledi, dep habarlaıdy infohub.kz saıty.
Almaty Joly málimetinshe, aldymen №1 tundyrǵyshtan (dambadan) Ál-Farabı dańǵylyna deıingi shyǵys jaǵy jabylady. Dál osy jerde shaǵyn júzý alaby jáne sport alańdarynyń kópshiligi ornalasqan. Keıin shekteýler jaǵalaýdyń qalǵan bólikterine, Abaı dańǵylyna deıin birtindep taralady.
Jóndeý barysynda sýarý júıesin qalpyna keltirý, trotýarlardy jańartý, bordúrlerdi ishinara aýystyrý, butalar men kógaldardy kóshirý, sondaı-aq aǵashtardy sanıtarlyq kesý josparlanýda.
«Qala turǵyndary men qonaqtaryn ýaqytsha shekteýlerdi eskerýge, ýaqytsha jol belgileriniń talaptaryn saqtaýǵa jáne baǵytty aldyn ala josparlaýdy suraımyz», — delingen Almaty Joly habarlamasynda.
№1 tundyrǵyshtan (dambadan) Ál-Farabı dańǵylyna deıingi shyǵys jaǵymen ótý 20 kúnge shekteledi.
Eske salaıyq, Úlken Almaty jaǵalaýyndaǵy rekonstrýksıany 2024 jyldyń qazan aıynan bastap «Pavlodar ózen porty» AQ júrgizip jatyr. Osy ýaqyt ishinde joba qala turǵyndary tarapynan da, qala ákimdigi tarapynan da birneshe ret synǵa ushyrady. Bastapqyda nysannyń pasportyna sáıkes rekonstrýksıany 2025 jyldyń jeltoqsanynda aıaqtaý josparlanǵan bolatyn, alaıda keıin merzim 2026 jyldyń mamyr aıynyń sońyna aýystyryldy. Jańa shekteýler jumystardyń áli aıaqtalmaǵanyn kórsetedi.
Buǵan deıin Kursiv LifeStyle jaǵalaýdaǵy rekonstrýksıanyń almatylyq jańbyrǵa tótep bere almaǵanyn jazǵan edi.