Densaýlyq saqtaý mınıstrliginiń basshysy Qazaqstannyń óńirlerinde balalarǵa stomatologıalyq kómektiń naqty qoljetimdiligin kúsheıtýdi tapsyrdy, dep habarlaıdy infohub.kz.
Densaýlyq saqtaý mınıstrliginiń Telegram-arnasynda Aqmaral Alnazarova óńir basshylaryna stomatologıalyq kómek kórsetýde mektep jasyna deıingi balalarǵa erekshe nazar aýdarýdy jáne emdeýge talon alýdaǵy kezekterdi joıýdy tapsyrǵany aıtyldy.
«Biz úshin eń bastysy – eseptilik emes, qaǵazdaǵy sandar emes. Ár kórsetkishtiń artynda naqty bala men naqty otbasy tur. Eger ata-analar balasyna stomatologıalyq kómek alý úshin tańǵy saǵat beste kelip, kezekte turýǵa májbúr bolsa, bul júıeniń jetkilikti jaqsy jumys istemeıtinin bildiredi. Biz muny túzetýimiz kerek», – dedi vedomstvo basshysy.
Mınıstr memlekettik baǵdarlamalar aıasynda balalarǵa stomatologıalyq kómek memleket tarapynan qarjylandyrylatynyn atap ótti. Osyǵan baılanysty, onyń aıtýynsha, negizgi nazar bar resýrstardy tıimdi uıymdastyrý men úılestirýge aýdarylýy kerek.
«Biz bul máseleni ata-analardyń moınyna júktemeýimiz kerek nemese ár joly qosymsha búdjet qarajatyn izdemeýimiz kerek. Eń aldymen, bar resýrstardyń jumysyn durys uıymdastyrý qajet. Bala ata-anasy talon ala almaǵany nemese birneshe saǵat kezekte turǵany úshin kómeksiz qalmaýy kerek. Bizdiń mindetimiz – qajetti kómektiń ýaqtyly jáne otbasynyń turǵylyqty jerine jaqyn jerde qoljetimdi bolýyn qamtamasyz etý», – dedi Aqmaral Alnazarova.
Mınıstr oblys ákimderiniń orynbasarlary men tıisti basqarmalarǵa densaýlyq saqtaý, bilim berý basqarmalary, medısınalyq uıymdar jáne Áleýmettik medısınalyq saqtandyrý qory arasyndaǵy úılestirýdi kúsheıtýdi tapsyrdy.
«Biz ata-analardyń áleýmettik jelilerge júginýin nemese shaǵym jazýyn kútpeýimiz kerek. Jergilikti basshylar mundaı máselelerdi erterek kórip, adam medısınalyq kómek alýda kedergige tap bolǵanǵa deıin sheshýi tıis», – dep qosty mınıstr.
Densaýlyq saqtaý mınıstrligi eldiń barlyq óńirlerinde balalarǵa medısınalyq qyzmetterdiń naqty qoljetimdiligin baǵalaı otyryp, jaǵdaıdy baqylaýdy jalǵastyratynyn jetkizdi.