Qytaılyq elektrokólikterdi satyp alyp, qaıta satýmen aınalysqan qazaqstandyq kásipkerler avtosalon ıesiniń aldaýynan 700 mln teńge joǵaltqandaryn málimdedi, dep habarlaıdy infohub.kz saıty.
Almatydaǵy qytaı kólikterin qaıta satýmen aınalysatyn 40 kásipker avtosalon ıesiniń alaıaqtyǵynyń qurbany bolǵandaryn aıtady. Olardyń sózinshe, olarǵa kólikterdi satyp, túsken paıdany bólisýdi ýáde etken.
«Maǵan qońyraý shalyp, Changan CS55 Plus kerek ekenin, Shymkentte klıentter baryn aıtty: "Aqshany 3-4 kúnde qaıtaramyz, klıentter daıyn tur". Jaraıdy, kelistik. Eki kólikti ákeldik. Olar satyldy. Bul 12 maýsymda boldy. Qazir tamyz, eki aı ótti. Áli kúnge deıin aqsha joq», — dedi kásipker Nurjan Boshtaı.
Odan keıin, satýshynyń aıtýynsha, onyń kólikteri qaıta satyla bergen. Osy ýaqyt ishinde kóliktiń úsh ıesi aýysqan, qazir kólik kepilde tur. Dál osyndaı máselemen keminde 40 satýshy kezikken, olardyń barlyǵy bir avtosalonmen jumys istegen.
«Biz avtosalon ıesiniń buryn da alaıaq bolǵanyn bildik. Eger ol ózi habarlasqanda, biz oǵan aqsha men kólik bermes edik. Sondyqtan ol óz ornyna agentterin jibergen. Bizdiń bilýimizshe, onyń úsh avtosalony bolǵan. Ol adamdardy bir jyldan astam ýaqyt boıy aldap júr dep oılaımyn», — dedi kásipker Ádil Bekjan.
Satýshylardyń aıtýynsha, avtosalon aýmaǵy eki apta buryn mórlengen. Oǵan deıin bir aı boıy munda satylymǵa qoıylǵan qytaı kólikteri turǵan. Qazir qaqpalar jabyq, aýmaqta kólik joq.
Kásipkerler polısıaǵa aryzdanǵan, sol kúni avtosalon ıesi ustalǵan. «Kúdikti ustalyp, ýaqytsha ustaý ızolátoryna qamaldy. Asa iri kólemde jasalǵan alaıaqtyq faktisi boıynsha qylmystyq is qozǵaldy. Qazirgi ýaqytta qylmysqa qatysy bar basqa adamdardyń sheńberi anyqtalýda», — dedi Almaty qalalyq PD resmı ókili Saltanat Ázirbek.
Aıta keteıik, avtosalon ıesine jeti jylǵa deıin bas bostandyǵynan aıyrý jazasy qaýip tónip tur.