«Qazmyrysh» quramyna kiretin «Altyntaý Kókshetaý» altyn óndirýshi kompanıasy Aqmola oblysynyń Zerendi aýdanyndaǵy ken ornyn jer asty ádisimen ıgerýge kiristi. Nysanda alǵashqy jer asty jarylysy jasalyp, bolashaq kenishtiń portalyn ótýge bastama berdi. Bul ken ornynyń qyzmet etý merzimin 2047 jylǵa deıin uzartýǵa múmkindik beredi, dep habarlaıdy infohub.kz saıty.
Óndiristi keńeıtý úshin jergilikti atqarýshy organdar kásiporynǵa 1057 gektar qosymsha ýchaske bóldi. Alǵashqy jumystar bıylǵy jyldyń qańtarynda bastalǵan edi, sol kezde taý-kenshiler taý jynysynyń alǵashqy shómishin kótergen bolatyn. Kompanıa altyn quramdy kendi óndirip, ony №1185 jer qoınaýyn paıdalaný sharty aıasynda menshikti fabrıkasynda altyn konsentratyna óńdeıdi.
«Jobanyń iske asýy Aqmola oblysynyń damýyna eleýli úles qosady, jańa jumys oryndaryn ashady jáne kásiporynnyń odan ári damýyna jańa serpin beredi», – dep atap ótti Aqmola oblysy ákiminiń orynbasary Ernar Jarkeshov.
Búginde «Altyntaý Kókshetaý» óńirdiń ónerkásip óndirisiniń 17%-yn jáne óńdeý ónerkásibiniń 23%-yn qamtamasyz etedi. Kásiporynda 1700-den astam adam eńbek etedi.
«Bolashaq jer asty kenishiniń portalyn ótý kezindegi alǵashqy jarylys – kompanıa tarıhyndaǵy mańyzdy qadam. Bul oqıǵanyń artynda ujymnyń úlken eńbegi jáne biz dáıekti túrde júrip ótken jańa kezeń tur», – dep atap ótti «Altyntaý Kókshetaý» bas dırektory Arman Álıev.
2025 jylǵy qarjylyq eseptilikke sáıkes, kompanıanyń taza paıdasy 77,5%-ǵa – 211,6 mlrd teńgeden 375,6 mlrd teńgege deıin ósti.
Sońǵy aılarda naryqta shveısarıalyq treıder Glencore International AG kompanıasynyń «Qazmyryshtaǵy» úlesin satýy múmkin degen másele belsendi talqylanýda. Mámile quny $3,5 mlrd bolyp baǵalanýda. 2025 jylǵy 31 jeltoqsandaǵy jaǵdaı boıynsha Glencore «Qazmyrysh» bas kompanıasy aksıalarynyń 69,74%-yna ıe, memlekettik «Taý-Ken Samuryq» – 29,82%-yna, qalǵan aksıonerler – 0,44%-yna ıe.