Túrkistan oblysynyń Otyrar aýdanynda jeti kún buryn joǵalǵan ana men tórt balasy aman-esen tabyldy, dep habarlaıdy infohub.kz.
Polısıa málimetinshe, jergilikti turǵyn quqyq qorǵaý organdaryna áıeli men tórt balasynyń úıden shyǵyp ketip, qaıtyp oralmaǵany týraly aryzdanǵan. Osydan keıin polısıa qyzmetkerleri jedel-izdestirý sharalaryn bastap, aýdanǵa kiretin jáne shyǵatyn joldarda baqylaý-ótkizý pýnktterin quryp, kórshiles aımaqtarǵa baǵdarlama joldady.
İzdestirý barysynda 6, 5 jáne 3 jastaǵy úsh balasymen jáne 10 aılyq sábıimen birge ketken áıel taksıden tabylyp, polısıa bólimine jetkizildi.
Tekserý barysynda áıeldiń kúıeýimen turmystyq janjaldan keıin balalary men qujattaryn alyp, eshkimge aıtpastan Shymkentke ketkeni jáne sol jaqta jaldamaly páterde turǵany anyqtaldy.
Polısıanyń habarlaýynsha, otbasy múshelerimen profılaktıkalyq áńgime júrgizilip, týystarynyń qatysýymen taraptar tatýlasqan. Anasy balalarymen birge úıine aman-esen oraldy.