Almatylyq 18 jastaǵy Anna Cherkashına jeńil atletıkadan jastar arasyndaǵy álem chempıonatynyń fınalyna joldama aldy. AQSH-tyń Iýdjın qalasynda ótip jatqan jarystyń irikteý kezeńinde ol 4,10 metr bıiktikti eńserip, jeke rekordyn jańartty. Bul nátıje Qazaqstannyń da rekordy bolyp tabylady. Osy kórsetkishpen ol 8 tamyzda medal úshin kúresetin 13 fınalısttiń qataryna endi. Barlyq fınalıstter birdeı nátıje kórsetkendikten, fınal shıelenisti bolady dep kútilýde, dep habarlaıdy infohub.kz.
Bul chempıonatta Qazaqstan quramasyn alty jigit pen bes qyz namysyn qorǵap jatyr. Olardyń barlyǵy qajetti normatıvterdi oryndaǵan. Bul — 2008 jyldan beri eń kóp quram. Sonda Polshanyń Bydgosh qalasynda ótken jastar arasyndaǵy álem chempıonatynda 12 sportshy qatysqan edi. Salystyrý úshin, eki jyl buryn Perý astanasy Lımada nebári bes ókil bolsa, 2022 jyly Kolýmbıanyń Kalı qalasynda tórteýi ǵana baq synaǵan.
Qazaqstan Respýblıkasy jeńil atletıka federasıasynyń baspasóz qyzmetiniń málimetinshe, 1994 jyly Lıssabonda ótken jastar arasyndaǵy álem chempıonatyna alǵash qatysqannan beri qazaqstandyq sportshylar birde-bir týrnırdi jiberip almaǵan. Sol jyly Portýgalıa astanasynda el namysyn Andreı Taranenko, Andreı Sklárenko, Vıktorıa Tokonbaeva, Natalá Dorohına jáne Svetlana Badrankova qorǵaǵan. Osy jarystarǵa qatysý tarıhynda qazaqstandyq jeńil atletter áli kúnge deıin júldeli orynǵa kóterile almaı keledi.