Anthropic kompanıasy ázirlegen Claude jasandy ıntellekt modeli genetıkalyq derekterdi avtonomdy taldaý barysynda bakterıofagtardyń — bakterıalardy zaqymdaıtyn vırýstardyń — DNQ-synda buryn belgisiz fermenttik júıeni anyqtady. Bul týraly infohub.kz saıty habarlaıdy.
Jańa júıe massıvtermen baılanysqan keri transkrıptazalar nemese ART (array-associated reverse transcriptases) dep ataldy. Onyń basty ereksheligi — ferment geniniń janynda qaıtalanatyn DNQ fragmentteriniń bolýy, bul qurylymy jaǵynan ataqty CRISPR genomyn óńdeý tehnologıasyna uqsaıdy.
Tájirıbege shamamen 950 JI-agent qatysyp, olar 21,5 saǵat boıy adamnyń tikeleı aralasýynsyz 1,9 mıllıard aqýyz klasterinen turatyn derekqorda avtonomdy izdeý júrgizdi. Sodan keıin kompanıa ǵalymdary zerthanalyq synaqtar ótkizip, tabylǵan qurylymnyń bar ekenin rastady.
Ashylymnyń biregeıligine qaramastan, sarapshylar men ázirleýshilerdiń ózderi ART júıesiniń naqty fýnksıalary áli anyqtalmaǵanyn atap ótedi. Qazirgi tańda onyń CRISPR sıaqty genderdi maqsatty óńdeýge qoldanylýy múmkin be, belgisiz.
Massachýsets tehnologıalyq ınstıtýty men Garvard ýnıversıteti janyndaǵy Brod ınstıtýtynyń molekýlalyq bıology Fen Chjan mundaı qurylymdardyń tabylýy ǵylym úshin úlken qyzyǵýshylyq týdyratynyn jáne JI-agentterdiń bıologıalyq zertteýlerdegi joǵary áleýetin kórsetetinin atap ótti.