Qazaqstandyqtarǵa Aral teńizindegi sý deńgeıi týraly úmit kúttirer jańalyq aıtyldy. Soltústik Aral teńizindegi sý kólemi 23,4 mlrd tekshe metrge deıin artty, dep habarlaıdy infohub.kz saıty.
QR Sý resýrstary jáne ırrıgasıa mınıstrliginiń málimetinshe, ótken jyldyń qazan aıynan bastap Soltústik Aral teńizine 1,2 mlrd tekshe metr sý jiberilgen. Sońǵy jyldary qabyldanǵan sharalar teńizge sýdyń turaqty aǵynyn qamtamasyz etýge múmkindik berdi.
2025 jyldyń 1 qazanynan búginge deıin Syrdarıa ózeni arqyly Soltústik Aralǵa shamamen 1,2 mlrd tekshe metr sý baǵyttaldy. Aǵymdaǵy vegetasıalyq kezeńde teńizge sekýndyna 14 tekshe metr sý túsýde. Vegetasıalyq kezeńniń sońyna deıin sý berýdi birtindep sekýndyna 100-150 tekshe metrge deıin arttyrý josparlanýda.
Qazirgi ýaqytta Soltústik Araldaǵy sý kólemi 23,4 mlrd tekshe metrdi quraıdy.
«Soltústik Araldy saqtaý maqsatynda birqatar joba júzege asyrylýda, onyń ishinde Syrdarıa ózeni alabynda sý esebin avtomattandyrý jáne gıdrotehnıkalyq qurylystardy qaıta jańartý bar. Sondaı-aq kórshiles memlekettermen ózara is-qımyl nyǵaıtylýda. Mysaly, Ózbekstan Respýblıkasymen transshekaralyq sý obektilerin birlesip basqarý jáne utymdy paıdalaný týraly kelisimge qol qoıyldy, bul on jyldyq kelissózderdiń nátıjesi bolyp tabylady», — dedi sý resýrstary jáne ırrıgasıa birinshi vıse-mınıstri Nurlan Aldamjarov.
Eske sala keteıik, birneshe jyl buryn Qazaqstan kórshiles eldermen Aral teńizin tolyqtyrý týraly kelisken bolatyn. Keıin Ekologıa mınıstrligi Aral teńiziniń túbinde sekseýil ormany paıda bolatynyn habarlaǵan edi.
2026 jyldyń sáýirinde Qasym-Jomart Toqaev Óńirlik ekologıalyq samıtte sóılegen sózinde Aral teńiziniń jaı-kúıi týraly málimdeme jasady.