Otyz jyldan keıin Arqalyqta turaqty áýe qatynasy qaıta iske qosyldy. 22 tamyzdan bastap qaladan Astana, Almaty jáne Qostanaı baǵyttaryna reıster oryndalady, dep habarlaıdy infohub.kz.
Alǵashqy bolyp Astana – Arqalyq – Astana baǵyty ashylady. Ushýlardy SCAT áýekompanıasy oryndaıdy. Astana men Arqalyq arasyndaǵy reıster aptasyna eki ret oryndalady, bılet quny bir baǵytqa 10 myń teńgeni quraıdy.
Almaty – Arqalyq – Almaty baǵyty boıynsha da aptasyna eki reıs josparlanǵan. Bir baǵytqa bılet 25 myń teńge turady.
Sonymen qatar, oblysishilik Qostanaı – Arqalyq – Qostanaı baǵyty iske qosylady. Ol da aptasyna eki ret oryndalady, bılet quny bir baǵytqa 10 myń teńge bolady.
Buǵan deıin, 12 tamyzda Arqalyq áýejaıynyń halyqaralyq IATA kody — AYK qalpyna keltirildi. Bul turaqty áýe qatynasyn qaıta jandandyrýǵa daıyndyq kezeńderiniń biri boldy.
Áýejaı jumysy 30 jyldyq úzilisten keıin qaıta bastalady. Kólik mınıstrliginde reısterdiń ashylýy Arqalyqtyń kóliktik qoljetimdiligin arttyryp, turǵyndarǵa, bıznes pen ınvestorlarǵa múmkindikterdi keńeıtedi dep sanaıdy.
Alǵashqy reıstiń ushyrylýyna kólik vıse-mınıstri Talǵat Lastaev, Qostanaı oblysy ákiminiń orynbasary Berik Tanjarıkov, ákimdik, avıasıa salasy jáne qoǵam ókilderi qatysty.
Buǵan deıin «Kýrsıv» Arqalyq áýejaıynyń rekonstrýksıany aıaqtap, qajetti sertıfıkattaý rásimderinen ótkenin jazǵan bolatyn. 3 tamyzda ol avıasıalyq qaýipsizdik qyzmetiniń sertıfıkatyn, 18 tamyzda «Qazaeronavıgasıanyń» aeronavıgasıalyq qyzmet kórsetýshi retinde sertıfıkatyn, al 21 tamyzda aerodromǵa jaramdylyq sertıfıkaty berildi.