Armenıanyń burynǵy prezıdenti Robert Kocharán memlekettik menshikti ıemdený jáne mıllıardtaǵan dram kóleminde para alý sqemalaryna qatysty aıyp taǵylǵannan keıin aýrýhanaǵa jetkizildi, dep habarlaıdy infohub.kz saıty.
Buǵan deıin Kocharán respýblıkanyń Sybaılas jemqorlyqqa qarsy komıtetine kelip, onyń ustalǵany saıasatkerdiń ókilderi tarapynan rastalǵan edi. Endi istiń resmı málimetteri belgili boldy.
News.am málimetinshe, Sybaılas jemqorlyqqa qarsy komıtet Kocharánnyń ustalǵanyn rastap, aıyptaý mánin ashty. Vedomstvonyń málimdeýinshe, burynǵy prezıdent jaqyn adamdarymen aldyn ala sóz baılasyp, qyzmet babyn paıdalana otyryp, jalǵan negizder boıynsha memleket menshigindegi birqatar qundy jyljymaıtyn múlikti naryqtyq baǵadan aıtarlyqtaı tómen baǵamen satyp alyp, ıemdengen.
Múliktiń naqty ıesin jasyrý úshin ol ózara baılanysty kompanıalarǵa resimdelgen, keıin bul aktıvter qurylys, satý jáne úlesterdi berý, onyń ishinde syıǵa tartý jolymen paıdalanylǵan.
Taǵy bir epızod boıynsha, Qorǵanys mınıstrligine tıesili jáne ǵylymı-óndiristik stansıa salýǵa arnalǵan jer telimderi burynǵy prezıdentke jaqyn kompanıaǵa naryqtyq baǵadan tórt ese tómen baǵamen satylǵan.
Sonymen qatar, tergeý organdarynyń málimdeýinshe, jer telimderin tómen baǵamen satý jáne Armenıada japondyq «Toıota» kompanıasynyń ókildigin kedergisiz qurýdy qamtamasyz etkeni úshin 2006 jylǵy 9 mamyrda Kocharánǵa para retinde «Toıota Erevan» kompanıasynyń 30 paıyzdyq úlesi berilgen. Bul úles burynǵy prezıdenttiń ulynyń atyna jalǵan satyp alý-satý sharttarymen resimdelgen.
Qylmystyq is aıasynda Kocharánnyń ózi, onyń uly jáne qylmystyq sqemalarǵa qatysy bar basqa da adamdar qosa alǵanda, alty adam ustaldy.
Tergeý sonymen qatar eks-prezıdenttiń ulynyń atyna 2001–2019 jyldary aýdarylǵan aqsha aýdarymdaryn zerttep jatyr: shamamen 144 mlrd dram, 309 mln AQSh dollary, 77 mln eýro jáne 18 mln reseı rýbli, sondaı-aq Armenıada jáne shetelde otyzdan astam jyljymaıtyn múlik nysanyn satyp alý. Múlikti ıemdenýdi boldyrmaý úshin oǵan tyıym salyndy.
Salyq organdary «Toyota» kompanıasynyń Erevandaǵy keńsesin mórlep tastady. Sybaılas jemqorlyqqa qarsy komıtet qyzmetkerleri sondaı-aq Kocharándar otbasy úlesi bar «Oranj Fıtnes» klýby men «Pleı sıtı» oıyn-saýyq ortalyǵynda tergeý áreketterin júrgizýde.
RBK derekterine sáıkes, armándyq 24news.am basylymy ustalǵannan keıin Kocharándy Ulttyq qaýipsizdik qyzmeti qyzmetkerleriniń ertip júrýimen jedel járdem kóligimen aýrýhanaǵa jetkizgenin habarlady. Onyń jaǵdaıy týraly basqa aqparat ázirge joq.