Áleýmettik jelilerde inDrive kompanıasynyń bas dırektory, mıllıoner Arsen Tomskı men Kamılla Lýkpanovanyń úılený toıy belsendi talqylanýda. Saltanatty rásim Stambýldaǵy Four Seasons qonaq úıinde ótti, dep habarlaıdy infohub.kz saıty.
Saltanattyń júrgizýshisi Ivan Ýrgant boldy, al shaqyrylǵan ártister arasynda Valerı Meladze de bar. Ataqty qonaqtar qatarynda olımpıada chempıony Mıhaıl Shaıdorov qyzy Aıslý Murzaǵalıevamen, akter ári prodúser Nurlan Qoıanbaev, ınvestor Marǵulan Seısembaev, «Technodom Operator» AQ negizin qalaýshy Edýard Kım, Astana Group kompanıalar tobynyń prezıdenti Nurlan Smaǵulov jáne basqa da bıznesmender boldy.
Áleýmettik jeli qoldanýshylary toıdyń altynsyz, ashyq sán-saltanatsyz ustamdy stılin atap ótýde. Qoldanýshylardyń biri: «Aqsha men jaqsy talǵam qatar kelgende sırek bolady. Óte ádemi, kórkem, ashyq bezendirýsiz», — dep jazdy.
Kelinniń beınesi de qarapaıym, biraq óte stıldi boldy. Kamılla Lýkpanova núd makıaj, áshekeısiz jáne kestesiz, ıyǵy ashyq, shleıfi bar aq kóılek tańdady. Bul Eva Lendel premıým úılený brendiniń Jess úlgisi bolýy múmkin, onyń quny keminde $2,5 myń. Kelinniń shashy qarapaıym etip túıinge jınalǵan.
Toıǵa daıyndyq maýsym aıynda belgili boldy, sol kezde Tomskı qazaqtyń quda túsý jáne syrǵa salý dástúrleri Oralda — kelinniń týǵan qalasynda ótkenin aıtqan edi. Kamıla Lýkpanova buryn Almaty Tourism Bureau basqarǵan, ýrbanıstıka máselelerimen aınalysatyn Tana qoryn qurǵan jáne Almatyda bilim alǵan. Áleýmettik jelilerge qaraǵanda, sońǵy kezderi ol Londonda turyp, oqyp júr.
Arsen Tomskı 2022 jyly inDrive keńsesin Reseıden Qazaqstanǵa kóshirip, Qazaqstan azamattyǵyn aldy. 2024 jyldyń mamyrynda ol $920 mln baılyǵymen Qazaqstannyń eń baı bıznesmenderi reıtıńinde 10-orynǵa ıe boldy. Tomskı úshin bul birinshi neke emes — onyń eki qyzy bar. Kamıla Lýkpanovanyń da bir qyzy bar.
Toı qarsańynda Tomskı Kursiv Talks podkastine qatysyp, bıznes týraly aıtyp, bolashaqqa boljamdarymen bólisip, balalyq shaǵy men qalyptasý joly týraly oı tolǵady.