Mamyr aıynyń sońynda Astana – Pavlodar tas jolynda bolǵan jol-kólik oqıǵasynan 20 jastaǵy Talǵat Emel zardap shekti. Ol astanadan ata-anasyna taksımen bara jatqanda, kólik jol bógetine soǵylǵan. Apat saldarynan úsh adam jaraqat aldy. Eń aýyr jaraqatty Talǵat aldy – ol klınıkalyq ólimdi bastan keshirip, eki aıaǵynan aıyryldy. Rólde Arys qalasy ákiminiń 22 jastaǵy uly bolǵan. Zardap shegýshiniń týystary ákesiniń baılanystary júrgizýshini jazadan qutqarýy múmkin dep qaýiptenedi, dep habarlaıdy infohub.kz.
Zardap shegýshiniń ápkesi Gúlsim Abaıyldınova: «Kináliniń týystary tergeý barysyna áser ete alady dep qaýiptenemin. Óıtkeni kináliniń ákesi – Arys qalasynyń ákimi. Men ádildik qalaımyn, zańnyń qatańdatylýyn qalaımyn. Onyń bir jyl ishinde 29 ret jol qozǵalysy erejesin buzǵany anyqtaldy», – dedi.
Júrgizýshiniń ákesi, Arys ákimi Qaısar Mańqaraev ulynyń kámeletke tolǵanyn jáne óz jaýapkershiligin ózi kóterýi tıis ekenin aıtty. Ol: «Men eshqashan laýazymdyq ókilettigimdi jeke múddeme paıdalanǵan emespin jáne paıdalanýdy oılamaımyn. Tergeý barysyna nemese is boıynsha qabyldanatyn prosesýaldyq sheshimderge áser etýge eshqandaı áreket jasamaǵanymdy jáne jasamaıtynymdy aıtamyn. Zań bárine birdeı. Bul qaǵıda meniń otbasymnyń múshelerine de birdeı qoldanylady», – dep atap ótti.
Taksı júrgizýshisi úı qamaýyna alynǵan. Oǵan qatysty «Jol qozǵalysy nemese kólik quraldaryn paıdalaný erejelerin buzý, abaısyzda adam densaýlyǵyna aýyr zıan keltirý» baby boıynsha sotqa deıingi tergeý júrgizilýde. Bul bap eki jylǵa deıin bas bostandyǵynan aıyrýdy kózdeıdi.
Buǵan deıin Mańǵystaýda tórt adam qaza tapqan taǵy bir jol-kólik oqıǵasynyń kinálisine úkim shyǵaryldy.