Qazaqstandyq shahmatshy Bıbısara Asaýbaeva Sent-Lýıste ótip jatqan Cairns Cup-2026 áıelder sýpertýrnıriniń ekinshi týrynda úndistandyq grosmeıster Vaıshalı Rameshbabýmen teń oınady. Qatar ótip jatqan erler týrnıri Sinquefield Cup-2026-da Asaýbaevanyń jigiti, ózbekstandyq Javohır Sındarov Vaıshalıdiń aǵasy Pragnanadha Rameshbabýdan utyldy, dep habarlaıdy infohub.kz.
Jaqynda ótken pretendentter týrnırinde úndistandyq shahmatshy Asaýbaevadan nebári 0,5 upaıǵa ozyp, qytaılyq Szúı Venszúnmen álemdik táj úshin machqa daıyndalyp jatyr. Kıprde qarsylastar eki ret teń oınaǵan bolatyn, al Sent-Lýıste Rameshbabý sátsiz start alyp, otandasy Dıvá Deshmýkhtan utylǵandyqtan, Asaýbaevamen oıyn ol úshin óte mańyzdy edi.
Aq túspen oınaǵan Asaýbaeva basymdyqqa jete almady. 38-shi júriste pozısıanyń úsh ret qaıtalanýyna baılanysty teń oıyn tirkeldi. Týrnırde amerıkandyq Elıs Lı men qytaılyq Tan Chjýnı eki upaıdan jınap, kósh bastap tur. Úshinshi týrda Asaýbaeva qara túspen Lımen oınaıdy.
Júlde qory 250 000 dollardy quraıtyn bedeldi Cairns Cup sýpertýrnıri amerıkandyq shahmattyń Mekkesi atalatyn Sent-Lýıste (Mıssýrı shtaty) ótýde. Týrnır Sent-Lýıs shahmat klýbynyń negizin qalaýshylardyń biri, Álemdik shahmat dańq zalynyń múshesi Djınn Kerns Sınkfıldtiń qurmetine atalǵan. Arnaıy shaqyrtý alǵan on shahmatshy bir aınalymda oınaıdy. Ýaqyt baqylaýy klasıkalyq: 40 júriske 90 mınýt, sodan keıin oıyn sońyna deıin 30 mınýt, ár júriske birinshiden bastap 30 sekýnd qosylady.
Sent-Lýıste qatar erler týrnıri Sinquefield Cup-2026 ótýde, ol da Djınn Kerns Sınkfıldtiń qurmetine atalǵan. Júlde qory 475 000 dollar bolatyn bul jarysqa shahmat tájine úmitker ózbekstandyq Javohır Sındarov qatysýda. Ekinshi týrda Asaýbaevanyń jigiti qara túspen Vaıshalıdiń aǵasy Pragnanandha Rameshbabýmen oınap, 95-shi júriste berildi.