Astana ákimdigi qoǵamdyq kólikte qolma-qol aqshasyz tólem jasaǵanda jol júrý qunyn 150 teńgege kóterýdi usynyp otyr. Jańa tarıf 2026 jylǵy 1 jeltoqsannan bastap kúshine enýi múmkin, dep habarlaıdy infohub.kz saıty.
Jańa tarıf qazirgi baǵadan 40 teńgege, ıaǵnı shamamen 36%-ǵa qymbat.
Ákimdikte baǵanyń ósýin tasymaldaýshylardyń shyǵyny artýymen túsindiredi. Vedomstvo dereginshe, 2014 jyldan beri dızel otynynyń baǵasy lıtrine 107 teńgeden 329 teńgege deıin kóterilgen. Ol kezde avtobýs júrgizýshileri orta eseppen 100–150 myń teńge alatyn bolsa, qazir olardyń jalaqysy 700 myń teńgeden bastalady, al mólsheri avtobýs synyby men jumys rejımine baılanysty. Qosalqy bólshekter, jóndeý jumystary jáne avtobýstardyń ózi de qymbattady. Sońǵy úsh jylda tasymaldaýshylar elorda úshin 1127 jańa avtobýs satyp alǵan.
«Paıdalaný shyǵyndarynyń ósýine, qoǵamdyq kóliktiń turaqty jumysyn qamtamasyz etý qajettiligine, avtobýs parkin odan ári jańartýǵa jáne baǵyt jelisin damytýǵa baılanysty 1 jeltoqsannan bastap qolma-qol aqshasyz tólem kezinde jol júrý qunyn 150 teńge mólsherinde belgileý usynylyp otyr», — dep málimdedi ákimdikte.
Ákimdiktiń habarlaýynsha, qazirgi jeńildik sanattary úshin tegin júrý saqtalady. Olardyń qatarynda zeınetkerler, múgedektigi bar adamdar, kópbalaly otbasylar jáne Astanada oqıtyn 18 jasqa deıingi balalar bar.
Tarıfti kóterý týraly sheshim ázirge qabyldanǵan joq. Eger ol bekitilse, 1 jeltoqsannan bastap qolma-qol aqshasyz tólem kezinde jol júrý 150 teńge turady.
Buǵan deıin «Kýrsıv» Astanadaǵy JRT jolaýshylary úshin jańa tarıfter engizilgenin jazǵan bolatyn.