Qazaqstan astanasynda kólik tonneliniń qurylysyna baılanysty Almaty kóshesiniń bir bóliginde jyl sońyna deıin qozǵalys shekteledi, dep habarlaıdy infohub.kz.
Qala ákimdiginiń málimetinshe, Astanada Almaty kóshesinde — Máńgilik El dańǵylynan Saýran kóshesine deıingi aralyqta kólik tonneliniń qurylysy jalǵasýda. Osyǵan baılanysty 15 tamyzdan bastap aǵymdaǵy jyldyń sońyna deıin Almaty kóshesiniń Túrkistan kóshesinen Máńgilik El dańǵylyna deıingi ýchaskesinde qozǵalys tolyǵymen jabylady. Al Almaty/Túrkistan jáne Almaty/Máńgilik El qıylystary ashyq qalady.
Ákimdik júrgizýshiler men jaıaý júrginshilerdi marshrýttaryn aldyn ala josparlaýdy suraıdy. Qaýipsizdikti qamtamasyz etý jáne qolaısyzdyqty azaıtý úshin ýaqytsha jol belgileri men kórsetkishter ornatylady. Bılik atalǵan ózgeristerdi túsinistikpen qabyldap, qala boıynsha júrý kezinde eskerýdi suraıdy.
Buǵan deıin Astananyń Esil aýdanynda Almaty kóshesinde uzyndyǵy 800 metr kólik tonneliniń qurylysy bastalǵany habarlanǵan bolatyn. Ol salynyp jatqan Prezıdenttik kitaphananyń janyndaǵy jańa jol aıryǵynyń bóligi bolady.