3 qazan kúni tańerteńnen bastap Astana turǵyndary áleýmettik jelilerde astanalyq joldardaǵy áskerı tehnıka men jabylǵan kósheler týraly habarlamalar men beıneler jarıalaı bastady. Qazaqstan Respýblıkasynyń Memlekettik kúzet qyzmeti bul 5–6 qazanda qalada birqatar halyqaralyq saıası is-sharalardyń ótýine baılanysty ekenin túsindirdi, dep habarlaıdy infohub.kz saıty.
Threads jelisindegi alldar.kose paıdalanýshysy: «Astana, ne bolyp jatyr? 3 qazan, 04:00», — dep jazdy. Taǵy bir paıdalanýshy Nat.store.lati da Astana kóshelerindegi jabylǵan joldar men áskerı tehnıka túsirilgen beıneni jarıalap, oǵan: «Tańnan beri ábiger, kimdi kútip otyrmyz, kim biledi?» — dep jazdy.
Keıinirek Memlekettik kúzet qyzmeti vedomstvonyń Instagram paraqshasynda resmı málimdeme jasady. Onda bylaı delingen: «Astanada 5-6 qazanda birqatar halyqaralyq saıası is-sharalardyń ótýine baılanysty astanalyq kóshelerdiń jekelegen ýchaskelerinde kólik quraldarynyń qozǵalysyna ýaqytsha shekteýler engiziledi. İs-sharalar arnaıy memlekettik organdardyń, quqyq qorǵaý organdarynyń jáne QR Qarýly kúshteriniń resýrstaryn paıdalanýdy kózdeıdi. Halyqaralyq deńgeıdegi mańyzdy oqıǵa kezinde qaýipsizdikti qamtamasyz etý jónindegi is-sharalarǵa túsinistikpen qaraýlaryńyzdy suraımyz».