Elordada 83 avtomobıl men arnaıy tehnıkany, sondaı-aq turǵyn úıi bar jer telimin aýksıon arqyly satý josparlanýda, dep habarlaıdy infohub.kz saıty.
Qalalyq aktıvter jáne memlekettik satyp alý basqarmasynyń basshysy Jandos Dáýletov Astana máslıhatynyń otyrysynda qandaı avtomobılderdi aýksıonǵa shyǵarý josparlanǵanyn aıtty. Ol ákimdik basqarmalary men vedimistik uıymdar budan bylaı paıdalanylmaıtyn nemese jaramsyz múlikti esepten shyǵarýdy usynǵanyn atap ótti.
«Qalalyq aktıvter jáne memlekettik satyp alý basqarmasy qala búdjetin tolyqtyrý jáne qala búdjetine qosymsha túsimderdi qamtamasyz etý úshin olardy satýǵa shyǵarýdy usynady. Jekeshelendirý E-Qazyna veb-portaly arqyly aýksıon nemese tender formatynda ótedi. Búginde 83 avtomobıl men arnaıy tehnıkany satýǵa shyǵarý usynylýda. Bul eski avtomobılder», — dedi ol.
Sonymen qatar, onyń aıtýynsha, Almaty aýdanynyń ákimdigi Sembınov kóshesi, 1/6 mekenjaıy boıynsha turǵyn úıdi jekeshelendirý týraly hat joldady. «Biz ony óz balansymyzǵa qabyldap, sodan keıin jekeshelendirýdi júrgizýdi usynamyz. Bul eski úı. 2012 jyly ol "Jańa Qurylys" kompanıasynan memleket menshigine qabyldanǵan. Investordyń iske asyrýy úshin biz ony aýksıonǵa shyǵarýymyz kerek. Baǵalaý júrgizip, soǵan sáıkes jer telimimen birge qunyn belgileımiz. Ǵımarattyń quny 12 mln, jer teliminiń quny — 29 mln», — dep atap ótti spıker.
Sonymen qatar, Almaty aýdanynyń ákimdiginen 164 saýda pavılonyn jekeshelendirý týraly hat kelip tústi — olar aýdan aýmaǵynda zańsyz ornalasqan. Sot sheshiminen keıin olar buzylyp, aýdan ákimdigine tapsyryldy.