Astanada kúz-qys maýsymyna jáne JRVI men tumaýmen syrqattanýshylyqtyń kútiletin ósýine daıyndyq qyzý júrip jatyr. Turǵyndardy vaksınasıalaý qyrkúıek aıynyń ortasynda bastalady, dep habarlaıdy infohub.kz saıty.
15 qyrkúıekten bastap Qazaqstanda tumaýǵa qarsy vaksınasıa naýqany bastalady. Eń aldymen táýekel tobyna jatatyn azamattar egiledi: medısına qyzmetkerleri, sozylmaly aýrýlary bar adamdar, balalar men oqýshylar, júkti áıelder, qart adamdar, sondaı-aq jabyq mekemeler men áleýmettik qorǵaý júıesindegi turǵyndar.
Elordanyń medısınalyq uıymdarynda JRVI belgileri bar naýqastardy qabyldaıtyn fıltr-kabınetter men jedel járdem kabınetteri daıyndalǵan. Munda tekserýden ótip, qajetti kómek alýǵa bolady. Bul kabınetterdiń jumys kestesi: jumys kúnderi — 08:00-den 20:00-ge deıin, demalys jáne mereke kúnderi — 08:00-den 18:00-ge deıin.
Sonymen qatar, alǵashqy medısınalyq-sanıtarlyq kómek uıymdarynda úıde kómek kórsetetin mobıldi brıgadalar jumys isteıdi. JRVI, tumaý jáne yqtımal asqyný belgileri bar júkti áıelder men bir jasqa deıingi balalarǵa erekshe nazar aýdarylady.
Stasıonarlar gospıtalızasıa sanynyń artýy jaǵdaıyna arnalǵan josparlardy da ázirledi. Qosymsha ınfeksıalyq tósekterdi ornalastyrý qarastyrylǵan, dári-dármek qory jasalǵan, tósek qorynyń toltyrylýyna turaqty baqylaý uıymdastyrylǵan. Eger ınfeksıalyq jáne reanımasıalyq tósekter belgilengen júkteme deńgeıine jetse, aýrýhanalarda qosymsha oryndar ornalastyrylady.
Bilim berý uıymdaryna qatysty jeke sharalar qarastyrylǵan. Mektepter men balabaqshalarda kúndelikti kelý monıtorıńi jáne «tańǵy fıltr» júrgiziledi. Naýqas balalar anyqtalǵan jaǵdaıda, olarmen baılanysta bolǵandarǵa medısınalyq baqylaý uıymdastyrylady. Eger bir synyptaǵy oqýshylardyń 30 paıyzy nemese odan kóbi aýyrsa, synypty qashyqtyqtan oqytý formatyna aýystyrý múmkindigi qarastyrylady.
Medısınalyq uıymdardyń epıdemıalyq maýsymǵa daıyndyǵy sanıtarlyq-epıdemıologıalyq qyzmet tarapynan 10 qyrkúıekke deıin baǵalanady. JRVI, tumaý jáne COVID-19 syrqattanýshylyǵynyń monıtorıńi júrgizilýde, maýsymdyq ósý kezeńinde baqylaý kúsheıtiledi.
Dárigerler elorda turǵyndaryn negizgi aldyn alý sharalaryn saqtaýǵa shaqyrady: adam kóp jınalatyn jerlerde maska kıý, qoldy únemi jýý, úı-jaılardy jeldetý jáne syrqattanýshylyq ósken kezeńde adam kóp jerlerge barýdy múmkindiginshe shekteý. Aýrýdyń alǵashqy belgileri — joǵary temperatýra, jótel, tamaq aýrýy, murynnyń aǵýy nemese álsizdik paıda bolǵanda, ózin-ózi emdeýmen aınalyspaý kerek. Turǵyndarǵa turǵylyqty jeri boıynsha emhanaǵa nemese fıltr-kabınetke ýaqytyly júginý usynylady.