Astanada 15–16 tamyzǵa josparlanǵan BRD AUTO SHOW and FESTIVAL avtofestıvali bastalar aldynda toqtatyldy. Sebep — aqımattyń tyıymy, dep habarlaıdy infohub.kz.
Avtoshoý baǵdarlamasynda biregeı avtomobılder men motosıklder kórmesi, drıft pen áserli kórsetilimder, avtodybys boıynsha jarystar, ártisterdiń óneri men dıdjeı-setter, ınteraktıvti aımaqtar, júldeler oınatý jáne marapattaý, Qazaqstannyń tanymal avtoblogerleri qatysatyn arnaıy nomınasıalar, avtosımýlátorlar men fotozonalar, kartıń aımaǵy, fýdkort jáne demalys aımaǵy bolýy tıis edi.
Alaıda tańerteń uıymdastyrýshylar men qonaqtardy aqımat qyzmetkerleri men polısıa qarsy aldy. Astana ishki saıasat basqarmasynyń qoǵamdyq-saıası jumys jáne áleýmettik jarnama bóliminiń bas mamany Ardan Aralbaev jınalǵandarǵa is-shara sporttyq-buqaralyq jáne kópshilik is-sharalardy ótkizý kezinde qaýipsizdikti qamtamasyz etý jónindegi nusqaýlyqqa sáıkes kelmegendikten toqtatylǵanyn túsindirdi.
Qarjylyq shyǵyndar men bıletterdi qaıtarýǵa kim jaýapty bolady degen suraqqa uıymdastyrýshylarǵa qalasa, sotqa júgine alatynyn aıtty. «Qurmetti azamattar, beıbit jıyndar men sherýler tek Astana aqımatymen kelisilgennen keıin ótkiziledi. Bul is-shara kelisilmegendikten, ony toqtatýdy suraımyn», — dep «Nura» aýdany ákimdigi apparatynyń qyzmetkeri Rýslan Sabıtov daýys zoraıtqysh arqyly málimdedi.
Astana avtomotosport federasıasynyń tóraǵasy Anatolı Bondardyń federasıa qyzmetin aıaqtaıtyn sońǵy festıváldi ótkizýge ruqsat berý týraly ótinishi de nátıje bermedi. «Biz Qazaqstanda bılikpen birlesip 500-den astam is-shara ótkizdik. Men búgin sońǵy is-sharany óz kepildigimmen ótkizýge daıynmyn. Jigitter jaı ǵana turady, sahna, shý men mýzyka bolmaıdy, biraq osymen federasıany jabamyz», — dedi Bondar.
Osydan keıin polısıa qyzmetkerleri jınalǵandardy tarap ketýge shaqyryp, áıtpese jıyn zańsyz dep tanylyp, polısıa shara qoldanatynyn eskertti.
Uıymdastyrýshylardyń biri Dmıtrı Karpınskı ıpodrom aýmaǵyn eki kúnge jaldaǵanyn jáne avtoshoý ótkizýge barlyq ruqsat qujattary bar ekenin aıtty. Birinshi kúnge 3 myńnan 8 myń teńgege deıingi baǵamen shamamen 2 myń bılet satylǵan. «Polısıa keshe keshten bastap kólikterdiń alańǵa kirýin shekteı bastady. Men tıisti aryz jazdym. Qazir advokattarmen keńesetin bolamyz, bılet aqshasyn qaıtaramyz. Aýmaqty jabý jáne qorshaý týraly resmı qujat alǵan joqpyn», — dedi ol.
Osydan keıin uıymdastyrýshylar, qatysýshylar men festıvál qonaqtary taraı bastady.