Qazaqstan astanasynda qalalyq elektr jelisine qosylmaı jumys isteıtin elektromobılderge arnalǵan avtonomdy kún zarádtaý stansıasy jumysyn bastady. Bul pılottyq joba el boıynsha osyndaı nysandar jelisin qurýǵa negiz bola alady, dep habarlaıdy infohub.kz saıty.
Ekologıalyq hab «Alataý» sport kesheniniń aýmaǵynda ornalastyryldy. Ony ázirleýshi — BOLASHAQ POWER qazaqstandyq kásiporny.
Stansıa off-grid formatynda jumys isteıdi, qýaty 100 kVt kún generasıasyn jalpy syıymdylyǵy 645 kVt·saǵ energıa jınaqtaǵyshtarmen biriktiredi. Nysan Qazaqstannyń Jasyl taksonomıasynyń talaptaryna da sáıkes keledi.
Qazirgi ýaqytta joba qatysýshylary respýblıkalyq trassalar boıyna, qalalarǵa, ónerkásiptik kásiporyndarǵa jáne basqa da ınfraqurylym nysandaryna osyndaı stansıalar ornatý múmkindigin qarastyrýda.
QR ekologıa jáne tabıǵı resýrstar vıse-mınıstri Mansur Oshýrbaevtyń aıtýynsha, mindet — jekelegen demonstrasıalyq jobalardan tolyqqandy ınfraqurylymǵa kóshý. «Biz jeke jasyl nysandardy emes, tómen kómirtekti ekonomıkanyń tutas ınfraqurylymyn qurýymyz kerek, onda jańartylatyn energetıka, elektr kóligi, ınovasıalyq tehnologıalar jáne kómirtekti jobalar birtutas júıe retinde jumys isteıdi», — dep atap ótti ol.
Vedomstvoda mundaı jelini damytý bir mezgilde elektromobılderge arnalǵan ınfraqurylymdy keńeıtýge jáne olardy paıdalanýdyń kómirtegi izin azaıtýǵa múmkindik beredi dep sanaıdy. Sonymen qatar, mundaı jobalardy Parıj kelisiminiń 6-baby aıasynda Qazaqstannyń jeke ınvestısıalardy tartýy jáne klımattyq jobalaryn damytý úshin paıdalaný josparlanýda.