Qazaqstan astanasynda polıseıler esirtki taratýǵa qatysy bar degen kúdikpen 32 jastaǵy er adamdy ustady. Tintý kezinde odan eki keliden astam tyıym salynǵan zat alyndy, dep habarlaıdy infohub.kz saıty.
Ustaý «Qarasora» jedel-profılaktıkalyq is-sharasy aıasynda júrgizildi. Quqyq qorǵaý organdarynyń málimetinshe, er adam jaldamaly kólikte júrgen jáne turǵyn úılerdiń biriniń janynda toqtatylǵan.
Onyń rúkzaginen aq untaq tárizdi zat salynǵan polıetılen paket tabyldy. Saraptama qorytyndysy boıynsha, bul — salmaǵy shamamen bir keli álfa-PVP.
Kúdiktiniń turǵylyqty mekenjaıy boıynsha júrgizilgen tintý kezinde asúıdegi shkaftan quramynda mefedron men kannabıs shaıyry bar taǵy eki plasık ydys tabyldy. Tárkilengen esirtki zattarynyń jalpy salmaǵy eki keliden asty.
Tergeý nusqasy boıynsha, ustalǵan adam «qoıma» rólin atqarǵan — esirtkini saqtap, olardy taratýmen aınalysqan basqa adamdarǵa berip otyrǵan.
Osy fakti boıynsha qylmystyq is qozǵaldy. Qazirgi ýaqytta polısıa zańsyz áreketke qatysqan basqa da yqtımal adamdardy anyqtaýda.
Buǵan deıin Almatyda polıseıler sıntetıkalyq esirtki satty degen kúdikpen er adamdy ustaǵany habarlanǵan bolatyn. Onyń kóliginen jáne jasyryn oryndardan 170 orama tabylsa, keıin Almaty oblysynda taǵy eki kelige jýyq tyıym salynǵan zat tárkilendi. Aldyn ala málimetterge sáıkes, ustalǵan adam esirtki taratatyn ınternet-dúkende jumys istegen.