Búgin ótken Astana maslıhatynyń otyrysynda avtokólikterdi evakýasıalaý tarıfterin kóterý máselesi talqylandy. Depýtattar qoldanystaǵy baǵalardy ózgertpeý týraly sheshim qabyldady, dep habarlaıdy infohub.kz.
Jol qozǵalysyn uıymdastyrý ortalyǵynyń basshysy Dáýren Sábıtovtiń málimetinshe, aı saıyn astanada 500-den astam avtokólik aıyppul turaǵyna jetkiziledi. Ol avtokólikterdi saqtaýdan túsetin kiris olardy kútip ustaý shyǵyndaryn ishinara ǵana jabatynyn atap ótti. Tasymaldaý men turaq quny 34 myń teńgeni quraǵanda, aıyppul turaǵy úshin tólem 3 AEK (12 975 teńge) mólsherinde belgilengen. Ortalyq basshysy sóz sóıleý barysynda tarıfti ózindik qunǵa jaqyndatýdy usyndy.
Alaıda maslıhat depýtattary bul usynysty qoldamaı, mindet — «adamdardy jazalaý emes» ekenin aıtyp, shyǵyndardy basqa jeke turaqtar esebinen jabýǵa usynys jasady.
«Ázirge tarıfterdi kótermeımiz, sondyqtan basqa máselelermen aınalysyńyzdar — zań boıynsha elektromobılderge tegin turaq máselesi áli sheshilmegen. Tarıfterden basqa da kóptegen problemalar bar. Aldymen solardy sheshýdi usynamyn», — dedi maslıhat tóraǵasy Tabıǵat Zeınýlqabden.
Eske salaıyq, sáýir aıynyń sońynan bastap Astanada toqtaý jáne turaq erejelerin buzǵany úshin avtokólikterdi aqyly evakýasıalaý resmı túrde qoldanyla bastady.