Júrgizýshiler Almaty oblysyndaǵy Astana – Qaraǵandy – Almaty tasjolynyń bir bóliginde jóndeý jumystaryna baılanysty ýaqytsha qozǵalys shekteletini týraly eskertildi, dep habarlaıdy infohub.kz saıty.
«KazAvtoJol» ulttyq avtokólik joldary operatorynyń málimetinshe, Almaty oblysynda respýblıkalyq mańyzy bar KAZ01 Astana – Qaraǵandy – Almaty avtomobıl jolynyń ýchaskesinde jóndeý-qurylys jumystaryna baılanysty kólik quraldarynyń qozǵalysy ýaqytsha shekteledi.
Shekteý 2026 jylǵy 17-20 tamyz aralyǵynda kún saıyn saǵat 06:00-den 20:00-ge deıin 1177 km (Aqsaı aýyly) – 1186 km (Jibek Joly aýyly) ýchaskesinde qoldanylady.
«Kórsetilgen kezeńde barlyq túrdegi kólik quraldarynyń qozǵalysy shekteledi. Jabyq ýchaskeni aınalyp ótý úshin Aqsaı – Baıkent, Baıkent – Boraldaı, Boraldaı – Jibek Joly avtomobıl joldary boıynsha balamaly baǵyttar qarastyrylǵan», – dep naqtylady «KazAvtoJol».
Júrgizýshilerden baǵyttaryn aldyn ala josparlaýdy, ýaqytsha shekteýlerdi eskerýdi jáne jol belgileriniń talaptaryn saqtaýdy suraıdy.
«Ýaqytsha qolaısyzdyqtar úshin keshirim suraımyz. Shekteýler jóndeý-qurylys jumystaryn qaýipsiz jáne sapaly júrgizý úshin qajet», – dep qosty «KazAvtoJol».