19 qyrkúıekten bastap elordada aýyl sharýashylyǵy jármeńkeleri bastalady. Ár óńirdiń fermerleri óz ónimderin astanalyqtarǵa tikeleı satady. Qyzylorda jáne Atyraý oblystarynyń taýar óndirýshileri qatysatyn alǵashqy jármeńke osy demalys kúnderi — 19 jáne 20 qyrkúıekte ótedi, dep habarlaıdy infohub.kz saıty.
Elorda ákimdiginiń baspasóz qyzmetiniń málimetinshe, jármeńkeler 1 qarashaǵa deıin demalys kúnderi ótedi.
«Osy demalysta, 19 jáne 20 qyrkúıekte elordada Qyzylorda jáne Atyraý oblystarynyń taýar óndirýshileri qatysatyn alǵashqy aýyl sharýashylyǵy jármeńkesi ótedi», — dep habarlady ákimdikte.
Astanaǵa 600 tonnadan astam ónim ákelinedi. Onyń ishinde:
260 tonna baqsha ónimderi;
220 tonna kúrish;
65 tonna balyq;
40 tonna et jáne et ónimderi;
20 tonnadan astam basqa da ónimder.
Jármeńkede et, balyq, sút jáne bakaleıa ónimderin satyp alýǵa bolady. Taýarlardy óndirýshiler tikeleı satady.
«Jármeńke «Qazanat» ıpodromynyń turaǵy aýmaǵynda, Qarqaraly tas joly, 1 mekenjaıy boıynsha ótedi. Sondaı-aq turǵyndar men elorda qonaqtaryna qolaıly bolý úshin jármeńke kezinde onyń ornyna № 18, 37 jáne 303 avtobýs baǵyttary qatynaıdy», — delingen habarlamada.
Jármeńke saǵat 9.00-den 18.00-ge deıin jumys isteıdi.
Buǵan deıin Kursiv LifeStyle senbide, 19 qyrkúıekte Almatydaǵy Villa Boutiques & Restaurants meıramhanasynda jaıly fermerlik market ótetinin jazǵan bolatyn. Kelýshilerge jergilikti ónimder, kofe, balmuzdaq, ashyq otta pisirilgen et jáne otbasylyq is-sharalar usynylady.