Astanada LRT qurylysyna jyl basynan beri 300 mlrd teńgeden astam qarajat jumsalǵan bolýy múmkin, dep habarlaıdy infohub.kz saıty.
Analıtıkterdiń esepteýinshe, bıylǵy segiz aıda elordalyq LRT qurylysyna 300 mln teńgeden astam qarjy ketken bolýy múmkin, dep jazady NUR.KZ Birinshi kredıttik búroǵa silteme jasap.
Analıtıkter Ulttyq statısıka búrosynyń derekterine súıene otyryp, jyl basynan Astanada temirjol jáne metro qurylysy boıynsha oryndalǵan jumys kólemi 306,5 mlrd teńgeni quraǵanyn málimdedi. Bul soma 2025 jyldyń sáıkes kezeńimen salystyrǵanda 2,2 ese kóp (ınflásıa esepke alynbaǵan). Sońǵy 10 jylda qańtar-tamyz aralyǵynda mundaı joǵary kórsetkish alǵash ret tirkelip otyr.
«Statısıkalyq kórsetkishtiń astarynda negizinen LRT qurylysyna jumsalǵan naqty shyǵyndar jatyr – bul Astananyń kólik ınfraqurylymyn damytý salasyndaǵy eń iri joba, sońǵy ýaqytta qarqyndy júzege asyrylyp keledi», – dep naqtylady búroda.
Osylaısha, 16 mamyrda LRT birinshi kezegi iske qosylyp, áýejaıdan jańa temirjol vokzalyna deıingi ýchaske paıdalanýǵa berildi. Birneshe kún buryn, 3 mamyrda, ekinshi kezektiń – Qosshy baǵytyndaǵy ýchaskeniń qurylysy bastalǵany belgili boldy, alǵashqy beton tirek quıyldy.
«Ashyq derekter LRT ekinshi kezegin salý qanshaǵa túsetinin anyqtaýǵa múmkindik bermeıdi. Aılar boıynsha oryndalǵan jumys kólemi naqty túsinik bermeıdi, óıtkeni ekinshi kezektiń qurylysy birinshi kezektiń aıaqtalýymen tuspa-tus keldi – eki oqıǵa da mamyrda boldy. Soǵan qaramastan, ekinshi kezektiń quny qazirgi tańda qańtar-tamyz kóleminiń keminde jartysyna sáıkes keledi dep boljaýǵa bolady. Sebebi, kezeńniń jalpy somasynyń 47%-y, ıaǵnı 146,1 mlrd teńge, shilde men tamyzǵa tıesili, al maýsym kórsetkishi nólge jýyq», – dep qosty analıtıkter.
Birinshi kredıttik búronyń dereginshe, jalpy alǵanda, LRT qurylysy bastalǵan 2017 jyldan beri Astanada temirjol jáne metro qurylysy boıynsha oryndalǵan jumys kólemi aǵymdaǵy baǵamen 756 mlrd teńgeni qurady. Aıta ketý kerek, LRT-ten bólek, bul soma elordanyń temirjol jelisin keńeıtýge baılanysty basqa da jobalarǵa jumsalǵan shyǵyndardy kórsetýi múmkin.
Eske salaıyq, Astanada Tarlan Astana (LRT) jelisiniń taǵy úsh jańa jelisi paıda bolady. Onyń bireýiniń qurylysy Qosshy qalasy baǵytynda bastalyp ketti.