1 tamyzdan bastap Tarlan Astana jeńil relsti kólik jelisinde keńeıtilgen tarıftik júıe iske qosylady. Bir rettik jolaqydan bólek, jolaýshylarǵa birneshe kúnge, bir aıǵa jáne úsh aıǵa arnalǵan joldamalar, sondaı-aq belgilengen sany bar jol júrý paketteri qoljetimdi bolady, dep habarlaıdy infohub.kz saıty.
Bir rettik jolaqy burynǵysynsha 200 teńgeni quraıdy. Jolaýshylarǵa arnalǵan joldamalar: bir kúndik — 500 teńge, úsh kúndik — 1500 teńge, bes kúndik — 2500 teńge, on kúndik — 4000 teńge, on bes kúndik — 5000 teńge, bir aılyq — 7500 teńge jáne úsh aılyq — 20 000 teńge.
Sonymen qatar, jol júrý paketterin satyp alýǵa bolady: bes joly — 900 teńge, ony — 1800 teńge, jıyrmasy — 3500 teńge, otyzy — 5000 teńge.
15-i kúnine deıin (sonyń ishinde) satyp alynǵan aılyq joldama aǵymdaǵy aıdyń sońyna deıin jaramdy. Eger 15-i kúninen keıin satyp alynsa, ony kelesi aıdyń birinshi kúninen bastap paıdalanýǵa bolady. Kúndik joldamalar men jol júrý paketteri alǵashqy valıdasıadan keıin kúshine enedi. Táýliktik tarıfter kúntizbelik kúnniń sońyna deıin, al paketter tólengen barlyq jol júrý sany paıdalanylǵanǵa deıin saqtalady.
Tarıfterdi Tarlan Astana stansıalaryndaǵy kasalardan satyp alýǵa bolady. Olar júıeniń kólik kartasyna jazylady, onyń balansyn kasadan nemese stansıadaǵy termınal arqyly tekserýge bolady. Kólik kartasy joǵalǵan jaǵdaıda belsendirilgen tarıfter qalpyna keltirilmeıdi jáne jańa kartaǵa aýystyrylmaıdy.
Qazirgi ýaqytta tarıfter tek Tarlan Astana jelisinde qoldanylady, alaıda olardy Astana avtobýs jelisimen biriktirý jumystary júrgizilýde.
Buǵan deıin Astana LRT-si jumys istegen alǵashqy bir jarym aıda 3,2 mıllıon jolaýshy tasymaldap, bılet satýdan 503 mıllıon teńgeden astam kiris túsirgeni habarlandy. Tek maýsym aıynda ǵana jańa jelimen 2,1 mıllıon adam paıdalanǵan.