Qazaqstan premer-lıgasynyń 21-týrynda «Astana» óz alańynda «Oqjetpesti» 2:1 esebimen jeńip, qola medal úshin básekede qarsylastarynan aıyrmasyn segiz upaıǵa jetkizdi, dep habarlaıdy infohub.kz.
Kezdesý bastalar aldynda komandalar burynǵy tanymal fýtbolshy, «Astana» júıesinde jas býyndy daıyndaǵan Aleksandr Lısınniń esimin bir mınýt únsizdikpen eske aldy.
Machta esepti 20-mınýtta qonaqtar ashty: ýkraınalyq qorǵaýshy Borıs Lotoskı alań ıeleriniń qaqpasyna dop soqty. Alaıda úziliske deıin «Astananyń» horvat legıonerleri Karlo Bartoles pen Marın Tomasov komandasyn alǵa shyǵardy. Grıgorı Babaıan shákirtteri fınaldyq ysqyryqqa deıin jeńis esebin saqtap qaldy.
Týrdyń paraleldi oıyndarynda Semeıdiń «Elimaıy» Pavlodardyń «Ertisin» 3:1 esebimen utsa, «Atyraý» men «Aqtóbe» teń oınady (1:1), «Altaı» men «Qyzyljar» 2:2 esebimen teń tústi, «Ordabasy» «Jetisýdy» 4:0 esebimen tas-talqan etti, al «Kaspı» «Ulytaýdy» mınımaldy eseppen (1:0) jeńdi.
«Qaırat» pen «Tobyl» qatysatyn oıyndar eýrokýbok oıyndaryna baılanysty keıinge shegerildi, olardyń kúntizbedegi orny keıinirek anyqtalady.
Chempıonattyń kelesi, 22-týry 14-15 tamyzda ótedi. Senbide «Qaırat» — «Ulytaý», «Ordabasy» — «Altaı», «Jeńis» — «Jetisý» jáne «Qaısar» — «Aqtóbe» machtary ótedi. Jeksenbide jankúıerler «Qyzyljar» — «Astana», «Atyraý» — «Oqjetpes», «Ertis» — «Tobyl» jáne «Kaspı» — «Elimaı» kezdesýlerin tamashalaıdy.