Astanada turaqta bolǵan órt saldarynan Audi A6 kóligi janyp ketken oqıǵa boıynsha sot sheshim shyǵardy. Oqıǵa 2025 jyldyń mamyr aıynda bolǵan, al órttiń sebebi — sóndirilmegen sirińke jáne kólik quralyn paıdalaný erejeleriniń buzylýy, dep habarlaıdy infohub.kz saıty.
Taraz qalalyq soty keltirilgen zalaldy óteý týraly talap-aryzdy qarap, bolǵan oqıǵaǵa eki kólik ıesiniń de kináli ekenin anyqtady. Jaýapker óz kóliginde otyryp, temeki tutatyp, ashyq terezeden sóndirilmegen sirińkeni laqtyryp jibergen. Sol sátte qasynda turǵan, gazbalondyq qondyrǵymen jabdyqtalǵan Audi A6 kóligi tutanyp ketken.
Júrgizilgen saraptama órttiń sebebi talapkerdiń kóliginen shyqqan gaz býynyń aǵyp ketýinen paıda bolǵan gaz-aýa qospasynyń tutanýy ekenin kórsetti. İs materıaldarynda: «Tutaný kózi jaýapker laqtyrǵan sóndirilmegen sirińke boldy» delingen.
Jaýapkerge qatysty qylmystyq is qasaqanalyqtyń bolmaýyna baılanysty toqtatyldy, al ákimshilik is eskirý merziminiń ótýine baılanysty jabyldy. Alaıda bul ony azamattyq-quqyqtyq jaýapkershilikten bosatpady.
Sonymen qatar, sot janyp ketken kóliktiń ıesi de óreskel abaısyzdyq tanytqanyn atap ótti. Ol uzaq ýaqyt turaqqa qoıar aldynda órt qaýipsizdiginiń mindetti talaptaryn oryndamaǵan, bul gazdyń aǵyp ketýine ákelgen. Sot sheshiminde: «Órt eki sebeptiń jıyntyǵynan boldy: jaýapkerdiń abaısyz áreketteri jáne talapker tarapynan kólikti paıdalaný erejeleriniń buzylýy» delingen.
Táýelsiz baǵalaý boıynsha, keltirilgen zalal 2,9 mıllıon teńgeden asty. Taraptardyń árqaısysynyń kinásiniń dárejesin eskere otyryp, sot talap-aryzdy ishinara qanaǵattandyryp, jaýapkerden 1,6 mıllıon teńgeden astam materıaldyq zalal jáne sot shyǵyndaryn óndirdi. Sot sheshimi zańdy kúshine endi.